ریاض: سعودی عرب میں تفریح کے لیے جانے والے 4 نوجوان المناک حادثے کا شکار ہوگئے، ان کی گاڑی پر چٹان گر پڑی جس سے چاروں جاں بحق ہوگئے۔
سعودی ویب سائٹ کے مطابق سعودی عرب کے جازان ریجن کی العارضہ کمشنری میں سعودی شہری دفاع کے اہلکاروں نے چٹان کے نیچے سے لاپتہ 4 سعودی نوجوانوں کی لاشیں نکال لیں، حادثہ گاڑی پر چٹان گر جانے کی وجہ سے حادثہ پیش آیا۔
جائے وقوع سے لاشیں نکالنے کا منظر دل دہلا دینے والا تھا، شہری دفاع کے اہلکاروں کے ساتھ مقامی نوجوان اور مقیم غیر ملکی بھی مدد کے لیے پہنچے ہوئے تھے۔
چاروں نوجوان گزشتہ ہفتے کو العارضہ پہاڑی علاقے میں سیر کے لیے نکلے تھے جہاں وہ لاپتہ ہوگئے تھے، مختلف ادارے ان کی تلاش میں تھے۔
2 نوجوانوں کے چچا ماجد جابر الجزمی نے سعودی میڈیا کو بتایا کہ وہ لوگ جائے وقوعہ سے متصل علاقے اور قریب کی وادیوں میں انہیں تلاش کرتے رہے، اسپتالوں اور ایسے تمام مقامات کو چیک کرلیا گیا تھا جہاں جہاں ان کے ملنے کی توقع کی جا سکتی تھی۔
چچا کے مطابق ان کے بھتیجے اپنے دوستوں کے ہمراہ العبادل پہاڑی علاقے میں سیر کے لیے نکلے تھے تاہم ان کی تاخیر پر گھر والے تشویش میں مبتلا ہوگئے۔ موبائل پر رابطے کی کوشش کی گئی تو فون بند پائے گئے۔
انہوں نے بتایا کہ ہم لوگ ان کی تلاش میں اس جگہ پہنچے جہاں سے وہ لاپتہ ہوئے تھے، 4 نوجوانوں میں سے 2 کی گاڑیاں مل گئیں، اس دوران پولیس کو بھی اطلاع کردی گئی۔
چچا کے مطابق بعض شہریوں نے اطلاع دی کہ انہیں العارضہ کے کوہستانی علاقے کی ایک وادی میں چٹانوں کے درمیان ایک ٹوٹی پھوٹی گاڑی نظر آرہی ہے اور خوفناک طریقے سے حادثے سے دوچار لگتی ہے۔
بعد ازاں یہ گمشدہ نوجوانوں کی گاڑی نکلی جو تفریح گاہ سے 3 کلو میٹر کے فاصلے پر تھی، حادثے کے بعد پورا علاقہ سوگوار ہے۔
