The news is by your side.

Advertisement

مسلم لیگ ن کا ایک اور رہنما گرفتار

لاہور : اینٹی کرپشن نےمسلم لیگ ن کے رہنمااحسن رضا خان کو گرفتار کر لیا، حکام کا کہنا ہے کہ احسن رضا خان نے غیر قانونی کمرشل مارکیٹ اور ہاؤسنگ سوسائٹی بنائی۔

تفصیلات کے مطابق اینٹی کرپشن کی کرپٹ عناصر کے خلاف کارروائیاں جاری ہیں ، اینٹی کرپشن پنجاب نے مسلم لیگ ن کے رہنمااحسن رضا خان کو گرفتار کر لیا، احسن رضا خان 2مختلف مقدمات میں مطلوب تھے۔

حکام کا کہنا ہے کہ احسن رضا خان نے غیر قانونی کمرشل مارکیٹ اور ہاؤسنگ سوسائٹی بنائی، گورنمنٹ اسپتال کنگن پور کی زمین پر مارکیٹ اور دکانیں بنائیں جبکہ ملزم نے خاندان کے افراد کے ساتھ الجنت ٹاؤن نامی سوسائٹی بنائی، ملکیتی ہاؤسنگ سوسائٹی اور کمرشل مارکیٹ منظور شدہ نہیں ہیں۔

گذشتہ روز ڈپٹی کمشنر ملتان کی درخواست پر اینٹی کرپشن نے مسلم لیگ ن کے سابق ایم این اے ملک عبدالغفار ڈوگر کو گرفتارکرلیا تھا، ملزم کے خلاف جعلسازی اور غیر قانونی قبضہ پر اینٹی کرپشن میں مقدمہ درج کیا جا چکا ہے۔

ریفرنس کے مطابق ملزم نے ایک کنال ایک مرلہ پر مشتمل گھر پر غیر قانونی قبضہ کر رکھا ہے، ملزم نے 2001 میں فروخت شدہ پراپرٹی کی جعلسازی اور فراڈ سے اپنے نام کی سیل ڈیڈ بنا کر قبضہ کیا، ملزم نے گھر کی ملکیت ظاہر کرنے کے لئے 1998 کی جعلی سیل ڈیڈ تیار کروا کر مزکورہ پراپرٹی پر قبضہ کیا۔

حکام نے بتایا کہ مزکورہ پراپرٹی 2001 میں کنیز اختر نے بُشری سلطانہ کو بیچی ،بشُری سلطانہ نے مظہر جاوید کو بیچی جس نے آگے مسلم کمرشل بینک کو قرض کے بدلے گروی رکھوا دی، مظہر جاوید کی طرف سے قرض کی ادائیگی نہ ہونے پر بینک نے نیلامی کا فیصلہ کیا، بینک کی نیلامی روکنے اور سرکار کو پراپرٹی ٹیکس سے محروم کرنے کے لئے ملزم نے جعلی سیل ڈیڈ تیار کی۔

ملزم نے اپنی ملکیت ظاہر کرنے کے لئے 1998 کی سیل ڈیڈ پر رجسٹری نمبر 2001 درج کیا جو کہ جعلی ہے۔

Comments

یہ بھی پڑھیں