کراچی : پی آئی اے کے بورڈ آف ڈائریکٹرز نے قائم مقام سی ای او ہلڈن برنڈ اور دیگر کو شوکاز نوٹس جاری کرنے کا فیصلہ کرلیا، ائیر بس 310 طیارے کی جرمن میوزیم کو مبینہ فروخت کی انکوائری رپورٹ اجلاس میں پیش کردی گئی۔
تفصیلات کے مطابق کراچی میں پی آئی اے کے بورڈ آف ڈائریکٹرز اجلاس منعقد ہوا، اجلاس کی اندرونی کہانی اے آر وائی نیوز کے سامنے آگئی، ذرائع کا کہنا ہے کہ اجلاس میں پی آئی اے کے ائیر بس 310 طیارے کی جرمن میوزیم کو مبینہ فروخت کی انکوائری رپورٹ پیش کی گئی۔
رپورٹ میں مبینہ ذمہ دار قرار دیئے گئے قائم مقام سی ای او ہلڈن برنڈ اور دیگر کو شوکاز نوٹس جاری کرنے کا فیصلہ کیا گیا۔ مبینہ ذمہ داروں میں ہلڈن برنڈ کے سابق چیف کو آرڈینیٹر ہلمٹ بیچوفنر اور ایک سابق ڈائریکٹر بھی شامل ہے۔
انکوائری رپورٹ کے مطابق ہلمٹ بیچوفنر طیارہ خریدنے والی کمپنی کا مبینہ ڈائریکٹر بھی ہے۔ ذرائع کا کہنا ہے کہ اکتوبر 2016 میں ہلمٹ بیچوفنر کی بطور ٹیکنیکل ایڈوائزر تعیناتی مبینہ طور پرہلڈن برنڈ کی خواہش پر کی گئی۔
اسکینڈل سامنے آنے پر ہلمٹ بیچوفنر کو ہلڈن برنڈ کا چیف کوآرڈینیٹر تعینات کر دیا گیا، شو کاز اورضابطے کی کارروائی تک قائم مقام سی ای او ہلڈن برنڈ بدستور رخصت پر رہیں گے۔
یاد رہے کہ ہلڈن برنڈ کو اس ماہ کے اوائل میں 20 اپریل تک جبری رخصت پر روانہ کیا گیا تھا۔
