اسلام آباد: ٹائیگرز فورس کو ملک بھرمیں متحرک کرنے کیلئے ایکشن پلان پر کام تیز کردیا گیا اور سیالکوٹ میں شروع کئےگئےٹیسٹ رن ماڈل کو صوبے میں شروع کرنے پر اتفاق کرلیا گیا ہے۔
تفصیلات کے مطابق ٹائیگر فورس کوملک بھرمیں متحرک کرنے کیلئے ایکشن پلان پر کام تیز کردیا گیا ، پنجاب کی اعلیٰ بیوروکریسی چیف سیکریٹری پنجاب, آئی جی تمام ڈویژنز کے کمشنرز، آر پی اوز کا مشترکہ اجلاس ہوا ، وزیراعظم کے معاون خصوصی عثمان ڈاربھی اجلاس میں موجود تھے۔
اجلاس میں پیر سے ٹائیگر فورس کو متحرک کرنے کے ایکشن پلان پر مشاورت ہوئی اور سیالکوٹ میں شروع کئےگئےٹیسٹ رن ماڈل کو صوبے میں شروع کرنے پر اتفاق کیا گیا جبکہ اس حوالے سے تمام ڈپٹی کمشنرز کو خصوصی ہدایات دے دی گئی ہے۔
چیف سیکریٹری پنجاب نے کہا کہ نوجوانوں کوملکی خدمت کابھرپورموقع دیں گے جبکہ آئی جی پنجاب کا کہنا تھا کہ رضا کاروں کو ایس او پیز پر عمل کرانے کیلئے تعاون فراہم کریں گے۔
اس موقع پر معاون خصوصی عثمان ڈار کا کہنا تھا کہ پنجاب سے6لاکھ سے زائد نوجوان فورس میں شامل ہوئے، ڈاکٹرز، انجینئرز اور نوجوانوں کی بڑی تعداد نے شرکت کی ہے۔
گذشتہ روز وزیراعظم عمران خان سے معاون خصوصی عثمان ڈار اور ثانیہ نشتر نے ملاقات کر کے ٹائیگر فورس کی رجسٹریشن اور ذمہ داریوں پر بریفنگ دی تھی۔
وزیراعظم نے رضا کار فورس سے خود خطاب کرنے کا فیصلہ کرتے ہوئے کہا تھا کہ ٹائیگر فورس کو سوموار سے پورے ملک میں متحرک کر دیا جائے اور میں خود سوشل میڈیا پلیٹ فارمز پر رجسٹرڈ نوجوانوں سے خطاب کروں گا۔
وزیراعظم کی ہدایات کے بعد عثمان ڈار متحرک ہوگئے اور بڑے پیمانے پر تیاریاں شروع کردیں،اس حوالے سے انہوں نے چیف سیکرٹری پنجاب اور کمشنرز کے ساتھ ویڈیو لنک اجلاس کیا۔
ٹائیگر فورس بے روزگار مزدوروں کی نشاندہی بھی کرے گی، احساس پروگرام کے ذریعے بے روزگار مزدوروں کی مالی مدد کی جائے گی جبکہ ٹائیگرز فورس سے مساجد، یوٹیلیٹی اسٹورز ،قورنطینہ سنٹز سمیت اہم مقامات پر خدمات لی جائیں گی۔
