تازہ ترین

آج معروف اداکار حسام قاضی کی برسی ہے

پاکستان ٹیلی ویژن کے معروف اداکار حسام قاضی 3 جولائی 2004 کو کراچی میں وفات پاگئے تھے۔ انھیں‌ دل کا دورہ پڑا تھا جو جان لیوا ثابت ہوا۔ آج اس اداکار کی برسی منائی جارہی ہے۔

1961 میں‌ پیدا ہونے والے حسام قاضی کا تعلق کوئٹہ سے تھا۔ انھوں نے بیالیس سال کی عمر پائی۔ اپنے فنی کیریئر کا آغاز ڈراما "خالی ہاتھ” سے کرنے والے حسام قاضی کو کاظم پاشا کے ڈراما سیریل "چھاؤں” سے پاکستان بھر میں شہرت ملی۔

حسام قاضی نے زمانہ طالبِ علمی میں‌ اداکاری کا آغاز کیا تھا۔ وہ کامرس میں ماسٹر کرنے کے بعد کوئٹہ کے ایک کالج میں لیکچرار مقرر ہوئے اور تدریسی مصروفیات کے ساتھ اداکاری کا سلسلہ بھی جاری رکھا۔ حسام قاضی پی ٹی وی کوئٹہ مرکز کے ان اداکاروں میں سے ایک تھے جنھیں اپنے کرداروں کے سبب ملک گیر شناخت اور مقبولیت حاصل ہوئی۔

حسام قاضی کے مشہور ڈرامہ سیریلوں میں ماروی، ایمرجنسی وارڈ، کشکول شامل ہیں۔ ان کی آخری زیر تکمیل ڈرامہ سیریل ’’مٹی کی محبت‘‘ تھی۔

سنہ 2000 میں‌ حسام قاضی کو دل کے عارضے کی تشخیص ہوئی تھی، تاہم ضروری علاج اور دیکھ بھال کے بعد وہ طبیعت میں‌ بتدریج بہتری محسوس کررہے تھے۔ انھوں نے آرام کی غرض سے کالج میں اپنی ذمہ داریوں‌ سے طویل رخصت لے رکھی تھی اور اپنے کنبے کے ساتھ کراچی منتقل ہوگئے تھے جہاں‌ آخری سانس تک قیام پذیر رہے۔

حسام قاضی نے ٹیلی ویژن پر اپنے وقت کے بڑے اور سینئر اداکاروں کے ساتھ کام کیا تھا۔ دھیما لہجہ، خوب صورت آواز اور عمدہ پرفارمنس ناظرین میں حسام قاضی کی مقبولیت کا سبب تھی۔ پی ٹی وی کے ناظرین نے خاص طور پر ڈرامہ ماروی میں‌ ان کی پرفارمنس کو بے حد پسند کیا تھا۔

Comments

- Advertisement -