تازہ ترین

اداکارعدنان صدیقی کا پاک فوج کے جوانوں کو خراج تحسین، ویڈیو وائرل

کراچی: نامور پاکستانی اداکار عدنان صدیقی نے بانسری پر ’اے راہ حق کے شہیدوں‘ بجا کر پاکستان کے بہادر جوانوں کو خراج تحسین پیش کیا ہے۔

تفصیلات کے مطابق پاکستانی فلم اور ڈرامہ انڈسٹری کے معروف اداکار عدنان صدیقی نے بانسری پر ’اے راہ حق کے شہیدوں‘ بجا کر پاک فوج کے بہادر جوانوں کو خراج تحسین پیش کیا ہے جس کی ویڈیو سوشل میڈیا پر وائرل ہوگئی۔

عدنان صدیقی نے سماجی رابطے کی ویب سائٹ انسٹاگرام پر کہا کہ شکریہ پاک فوج آپ اپنی جان خطرے میں ڈال کر ہمیں سکون سے سونے دیتے ہیں۔

عدنان صدیقی نے لکھا کہ ’ اے راہ حق کے شہیدوں‘ کو سب سے پہلے نسیم بیگم نے گایا تھا جس کے بعد اس خوبصورت گیت کو میڈم نور جہاں نے گایا، یہ گیت ہمیشہ میری آنکھوں میں آنسو لے آتا ہے۔

انہوں نے کہا کہ ہمارے جوانوں کی ملک کے لیے خدمت ہمارے تصور سے کہیں زیادہ ہے، ہم امن و چین سے رہیں اس لیے ہمارے جوان دن رات بغیر تھکے ملک کی حفاظت کرتے ہیں۔

عدنان صدیقی نے لکھا کہ آندھی آئے یا طوفان کوئی چیز انہیں نہیں روکتی وہ ہمارے لیے اپنی جان کی قربانیاں دینے سے بھی دریغ نہیں کرتے ہیں۔

معروف اداکار نے کہا کہ میں ہمارے وطن کی حفاظت کرنے والے ہر جوان کو سلام پیش کرتا ہوں، پاکستان زندہ باد۔

واضح رہے کہ چند روز قبل ایوارڈ شو کے دوران عدنان صدیقی نے بانسری پر ملی نغمے کی دھن بجا کر شائقین کو خوشگوار حیرت میں مبتلا کردیا تھا۔

Comments

- Advertisement -