The news is by your side.

Advertisement

ادنوک کی جانب سے تازہ ترین بلاک بسٹر آئی پی او، ابو ظہبی کی اب تک کی سب سے بڑی لسٹنگ

ابو ظہبی: متحدہ عرب امارات کی ابو ظہبی نیشنل آئل کمپنی (ادنوک) کی جانب سے تازہ ترین بلاک بسٹر آئی پی او، ابو ظہبی کی اب تک کی سب سے بڑی لسٹنگ قرار پائی ہے۔

مقامی میڈیا رپورٹ کے مطابق ابو ظہبی نیشنل آئل کمپنی (ادنوک) اور اس کے دیرینہ شراکت دار بوریالیس اے جی نے ابوظہبی سیکیورٹیز ایکسچینج (اے ڈی ایکس) میں اپنے پیٹرو کیمیکلز جوائنٹ وینچر،بروج پی ایل سی کی ابتدائی عوامی پیشکش کے لیے بک بلڈنگ اور پبلک سبسکرپشن کا عمل کامیابی سے مکمل کرنے کا اعلان کیا ہے۔

سیٹلمنٹ پر سیلنگ شیئر ہولڈرز، ادنوک اور بوریالیس کو 3 ارب 57 لاکھ 69 ہزار 158 پیش کردہ حصص جو جاری کردہ مجموعی حصص کیپٹل کے 10 فیصد کے مساوی ہے، فی حصص 2.45 درہم کی آفر پرائس کے ساتھ 2 ارب ڈالر سے زیادہ حاصل ہوں گے۔

حصص کی پیش کش کو نمایاں طور پر ہدف سے زیادہ سبسکرائب کیا گیا اور متحدہ عرب امارات کے خوردہ سرمایہ کاروں اور اہل ادارہ جاتی سرمایہ کاروں کی جانب سے زبردست مانگ دیکھنے میں آئی۔

آئی پی او کی کل مجموعی طلب 83 ارب 40 کروڑ ڈالر سے زیادہ رہی، عوامی سبسکرپشن کے عمل کے آغاز کے ایک گھنٹے سے بھی کم وقت کے اندر بک بلڈنگ کا عمل مکمل ہوگیا۔

اے ڈی ایکس پر لسٹنگ کی متوقع تاریخ 3 جون ہے، لسٹنگ کے بعد، ادنوک بروج میں 54 فیصد اکثریتی حصص کا مالک رہے گا، جبکہ بوریالیس ایم ای کے پاس 36 فیصد حصص ہوں گے۔

ادنوک ڈسٹری بیوشن، ادنوک ڈرلنگ اور فرٹی گلوب کی انتہائی کامیاب آئی پی او کے بعد بروج چوتھی کمپنی ہے جس کے حصص ادنوک کی جانب سے مارکیٹ میں پیش کیے گئے ہیں۔

ادنوک عالمی سطح پر کیمیکلز اور پیٹرو کیمیکل سیکٹر میں ترقی کے مواقع سے فائدہ اٹھانے کے لیے اچھی پوزیشن میں ہے۔

Comments

یہ بھی پڑھیں