The news is by your side.

Advertisement

ایمنڈ کی اقرار الحسن پر حملہ اور بہیمانہ تشدد کی مذمت

اسلام آباد: ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (ایمنڈ) نے اے آر وائی نیوز کے صحافی اقرار الحسن اور ان کی ٹیم پر حملے اور بہیمانہ تشدد کی مذمت کی پے۔

ایمنڈ نے اعلامیہ جاری کرتے ہوئے کہا ہے کہ انٹیلی جنس بیورو کراچی کے اراکین کا اقرار الحسن اور ان کی ٹیم پر تشدد قابل مذمت ہے، کسی بھی صحافی کی تحقیقاتی اسٹوری پر اس طرح غصہ نکالنا قابل مذمت ہے۔

ایمنڈ نے کہا کہ ایسے بزدلانہ اقدامات میڈیا کو اپنے فرائض سے نہیں روک سکتے، میڈیا کا کام عوام تک حقائق سامنے لانا ہے، وفاقی حکومت سے معاملے کی مکمل تحقیقات کا مطالبہ کرتے ہیں۔

ایمنڈ نے مطالبہ کیا کہ وفاقی حکومت اقرار الحسن اور ٹیم پر گھناؤنے حملے کے کرداروں کو سزا دے۔

اس سے قبل اے آر وائی نیٹ ورک کے صدر اور سی ای او سلمان اقبال نے آئی بی افسران کی جانب سے”ٹیم سرعام“ پر وحشیانہ حملے اور تشدد کی شدید الفاظ میں مذمت کی۔

سماجی رابطے کی ویب سائٹ ٹوئٹر پر اپنے ایک پیغام میں انہوں نے کہا کہ اقرار الحسن اور ان کی ٹیم پر آئی بی افسران و عملے کا وحشیانہ حملہ اور تشدد انتہائی قابل مذمت ہے، اقرار الحسن اور ان کی ٹیم پر تھرڈ گری ٹارچر کیا گیا، میری درخواست ہے کہ اس معاملے کی جلد از جلد تحقیقات کرکے ذمہ داروں کو سخت سزا دی جائے۔

سلمان اقبال نے اس اندوہناک واقعے کا فوری ایکشن لینے پر میں وزیر اعظم عمران خان کا شکر ادا بھی کیا۔

Comments

یہ بھی پڑھیں