کابل: افغان فورسز اور امریکی اتحادی افواج کی جانب سے افغان صوبے غزنی میں کارروائیاں جاری ہیں جس کے نتیجے میں اب تک 31 عسکریت پسند ہلاک ہوچکے ہیں۔
تفصیلات کے مطابق افغان صوبے غزنی میں افغان افواج کو امریکی فورسز کا تعاون حاصل ہے، جبکہ گذشتہ روز سے جاری کارروائیوں میں اب تک طالبان کے اکتیس شدت پسند ہلاک ہوچکے ہیں جبکہ طالبان کے حملے میں افغان فورسز کو بھی نقصان پہنچا ہے۔
افغان حکام کی جانب سے جاری کردہ بیان میں کہا گیا ہے کہ عسکریت پسند صوبے کے اہم مقامات کو نشانہ بنانا چاہتے ہیں جس کے لیے افغان فورسز اس صوبے کی ایک اہم شاہراہ اور مقامات پر طالبان کے حملے کو ناکام بنانے کی کوشش میں مصروف ہیں۔
افغانستان: طالبان کا حملہ، گورنر سمیت درجنوں جاں بحق، علاقے پر قبضہ
دوسری جانب افغان طالبان کی جانب سے جاری کردہ بیان میں کہا گیا ہے کہ افغان فورسز نے ہم پر حملہ کیا جس کا بھرپور جواب دیا گیا اور ان حملوں کے نتیجے میں اب تک نو افغان سکیورٹی اہلکار بھی ہلاک ہو چکے ہیں، اور اطراف میں موجود پولیس چوکیوں کو بھی مکمل تباہ کر دیا گیا ہے۔
خیال رہے کہ طالبان کے زیر اثر افغانستان کے مختلف علاقوں میں ان دنوں دہشت گردی کے واقعات میں اضافہ ہوا ہے جس کے بعد مقامی پولیس اور افغان فورسز کی پیشہ ورانہ خدمات پر سوالیہ نشان اٹھ رہا ہے۔
افغانستان: طالبان کا حملہ، 11 پولیس اہلکار جاں بحق، 2 زخمی
یاد رہے کہ گذشتہ دنوں طالبان کی جانب سے افغان صوبے غزنی پر حملہ کیا گیا تھا جس کے نتیجے میں ضلعی گورنر سمیت درجنوں افراد جاں بحق ہوئےتھے بعد ازاں طالبان نے علاقے پر قبضہ بھی کر لیا ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
