The news is by your side.

Advertisement

پاکستان کی مدد، جوبائیڈن کو بچانے والا افغان مترجم افغانستان سے نکلنے میں کامیاب

واشنگٹن: امریکی صدر جوبائیڈن کو بچانے والا افغان مترجم پاکستان کی مدد سے افغانستان سے نکلنے میں کامیاب ہوگیا۔

تفصیلات کے مطابق افغان مترجم امان خلیلی کے افغانستان سے انخلا کے لیے پاکستان کی مدد پر دی ہیومن کولیشن نامی تنظیم نے وزیر اعظم عمران خان کا شکریہ ادا کیا ہے۔

امریکی وزارتِ خارجہ نے پیر کو ایک بیان میں کہا کہ امان خلیلی کو ان کی فیملی کے ساتھ افغانستان سے نکالنے میں امریکی حکومت ان کی مدد کرنے والوں کی شکر گزار ہے۔

امان خلیلی کو ان کے اہل خانہ کے ساتھ مزار شریف سے کابل اور پھر افغانستان کے صوبہ ہلمند منتقل کیا گیا تھا، جہاں انھوں نے پاکستان کی مدد سے سرحد عبور کی اور پھر انھیں اسلام آباد سے دوسرے محفوظ مقام پر لے جایا گیا، ہیومن فرسٹ کولیشن نامی تنظیم نے انخلا کی نگرانی کی۔

امان خلیلی نے امریکی صدر بائیڈن کو اس وقت ریسکیو کیا تھا جب انھوں نے 2008 میں سینیٹر کے طور پر افغانستان کا دورہ کیا تھا، ایک طوفان کے دوران امریکی فوجی ہیلی کاپٹر کو ہنگامی طور پر لینڈنگ کرنی پڑی تھی، جس میں اس وقت کے سینیٹر بائیڈن اور دیگر امریکی قانون ساز سوار تھے۔

ہیلی کاپٹر کو افغانستان کے ایک دور دراز علاقے میں اتارنا پڑا تھا، جس پر حملے کا خطرہ تھا، اس وقت امان خلیلی نامی افغان مترجم نے اس قافلے کو ایک محفوظ مقام تک پہنچانے کی خدمت انجام دی تھی۔

Comments

یہ بھی پڑھیں