کابل : افغانستان میں فوجی ہیلی کاپٹر گرنے اور بس پر بم دھماکے کے نتیجے میں5 سیکیورٹی اہلکاروں سمیت 9 افراد ہلاک ہوگئے۔
عرب نیوز کے مطابق وزرات دفاع نے ہیلی کاپٹر کے حادثے کی تصدیق کی ہے۔ افغان وزارت دفاع کے بیان میں کہا گیا ہے کہ صوبہ میدان وردک میں پیش آنے والے اس حادثے کی تحقیقات کی جا رہی ہیں۔
سرکاری بیان کے مطابق ہلاک ہونے والوں میں ہیلی کاپٹر کے عملے کے ساتھ خصوصی فورس کے اہلکار بھی شامل تھے۔
خبر رساں ادارے روئٹرز کے مطابق فضائیہ کے ایک ذریعے اور ایک عہدیدار نے بتایا ہے کہ ہیلی کاپٹر کو اڑان
بھرتے ہوئے ایک راکٹ سے نشانہ بنایا گیا۔ خیال رہے کہ افغانستان میں طالبان جنگجو فوج کو نشانہ بناتے رہتے ہیں۔
افغان ذرائع کے مطابق 4 فوجی ہیلی کاپٹرز ضلع بہسود میں سامان اور کھانے پینے کے اشیاء لے کر جارہے تھے تاہم لینڈنگ کے دوران نامعلوم افراد نے راکٹ فائر کیا جس کی وجہ سے ایک ہیلی کاپٹر گر کر تباہ ہوگیا۔،
دوسری جانب دارالحکومت کابل میں سرکاری ملازمین کی بس کو دھماکے کا نشانہ بنایا گیا جس کے باعث 3 افراد ہلاک اور 11 زخمی ہوگئے جن کو اسپتال منتقل کردیا گیا ہے جب کہ دھماکے کی ذمہ داری اب تک کسی بھی گروپ کی جانب سے قبول نہیں کی گئی۔
