کابل: افغان طالبان کی قیادت نے ملک میں انسداد پولیو مہم جاری رکھنے کا اعلان کردیا۔
ذرائع ابلاغ کو طالبان ذرائع سے موصول ہونے والی اطلاعات کے مطابق افغان طالبان نے انسداد پولیو مہم کے حوالے سے بڑا فیصلہ کرتے ہوئے مہم جاری رکھنے کا اعلان کردیا۔
ذرائع کے مطابق افغان طالبان نے پاکستان کو انسداد پولیو سےمتعلق فیصلے سے آگاہ کیا اور انسداد پولیو کے لیے پاکستان کے ساتھ دو طرفہ تعاون کو جاری رکھنے کے عزم کا اظہار بھی کیا ہے۔
طالبان ذرائع کے مطابق ڈاکٹر ہجرت اللہ نبی زادہ کو افغان انسداد پولیو پروگرام کا سربراہ مقرر کیا گیا ہے، وہ قندھار میں انسداد پولیو ایڈوائزر کے طور پر کام کر چکے ہیں۔
مزید پڑھیں: افغانستان میں پولیو رضاکاروں پر فائرنگ، پانچ جاں بحق
یہ بھی پڑھیں: افغانستان : پولیو ٹیم پر حملہ، چار کارکن ہلاک
ذرائع کے مطابق قیادت کی منظوری کے بعد جلد افغانستان میں انسداد پولیو مہم کا آغاز کیا جائے گا، افغانستان میں شروع ہونے والی انسداد پولیو مہم سے پاکستان پر مثبت اثرات پڑیں گے۔
ذرائع کے مطابق پاکستان افغانستان انسداد پولیو کیلئے سالوں سے مشترکہ طور پر مل کر کام کر رہے ہیں، پاکستان افغانستان کو انسداد پولیو کیلئےہر ممکن تعاون فراہم کر رہا ہے، پاکستان نے افغانستان سے پولیو آپریشن سینٹر کی تشکیل میں تعاون بھی کیا تھا۔
یاد رہے کہ پاکستان، افغانستان ماضی میں مشترکہ انسدادپولیو مہم چلا چکے ہیں، پاکستان، افغانستان میں رواں سال ایک، ایک پولیو کیس سامنے آ چکا ہے۔
