کابل: افغان طالبان نے صوبہ جوزجان صوبے کے دارالحکومت شبرغان پر قبضہ کر لیا ہے۔
تفصیلات کے مطابق طالبان ترجمان ذبیح اللہ مجاہد کا کہنا ہے کہ طالبان نے جوزجان صوبے کے دارالحکومت شبرغان پر قبضہ کر لیا، یہ طالبان کے قبضے میں آنے والا دوسرا صوبائی دارالحکومت ہے۔
ترجمان وائٹ ہاوس کا کہنا ہے کہ طالبان کی جارحانہ کارروائیاں عالمی سطح پر ناقابل قبول ہیں، ادھر افغان وزارت دفاع کے مطابق 24 گھنٹوں میں 385 طالبان مارے گئے ہیں۔
مقامی میڈیا کے مطابق شبرغان شہر کے کئی علاقوں میں شدید لڑائی جاری ہے، طالبان زیادہ تر سرکاری عمارتوں اور شہر کا کنٹرول سنبھالنے میں کامیاب ہو گئے ہیں، تاحال حکومت کے زیر کنٹرول ایئر پورٹ کے لیے لڑائی جاری ہے۔
یاد رہے کہ گزشتہ روز طالبان نے جنوب مغربی صوبے نمروز کے صوبائی دارالحکومت زرنج پر بھی قبضہ کر لیا تھا۔ نمروز پولیس نے شکوہ کیا تھا کہ جنگجوؤں کے ساتھ جھڑپ کے لیے فوج نہیں بھیجی گئی، نہ ہی پولیس کے تازہ دم دستوں سے مدد کی گئی۔
په نیمروز ولایت کې ولسي خلکو د مجاهدینو ورتګ ته ښه راغلاست ووايه او هغه شیبې يې په ګرمو ولولو ولمانځلې چې مجاهدين ښارته داخليږي.
ملت مو اسلامي امارت غواړي او نور يې خپل تصمیم نیولی دی. ان شاءالله pic.twitter.com/bNiTPFb9Ib— Zabihullah (..ذبـــــیح الله م ) (@Zabehulah_M33) August 7, 2021
افغانستان کے دیگر صوبائی دارالحکومت جہاں اس وقت شدید لڑائی جاری ہے ان میں مغرب میں ہرات اور جنوب میں لشکر گاہ شامل ہیں۔
دوسری طرف سلامتی کونسل کے ہنگامی اجلاس میں دو ٹوک بتایا گیا تھا کہ افغانستان میں بہ زور قوت بننے والی حکومت قبول نہیں ہوگی، مذاکرات میں شامل ممالک طالبان کو جنگ بندی پر قائل کریں۔