افغانستان کرکٹ بورڈ نے احسان اللہ جنت پر کرپشن کے الزام میں پانچ سال کی پابندی عائد کردی۔
افغان کرکٹ بورڈ کے مطابق بلے باز احسان اللہ پر کابل پریمیئر لیگ 2024 میں کرپشن کا الزام ہے جبکہ کرکٹر نے تمام الزامات تسلیم کیے ہیں۔
بورڈ نے احسان اللہ جنت کو آئی سی سی کے انسداد بدعنوانی کوڈ کے آرٹیکل 2.1.1 کی خلاف ورزی کا قصوروار پایا، اس قانون کے تحت اثر و رسوخ کا غلط استعمال اور میچ میں ہیرا پھیری کرنے کا الزام ہے۔
اس خلاف ورزی کے نتیجے میں احسان اللہ پر فوری طور پر تمام فارمیٹ کی کرکٹ کھیلنے پر 5 سال کی پابندی ہے۔
دوسری جانب افغان بورڈ 3 دیگر کھلاڑیوں سے بھی ممکنہ کرپشن میں ملوث ہونے کی تحقیقات کررہا ہے۔
واضح رہے کہ 26 سالہ افغان کرکٹر احسان اللہ جنت نے کیرئیر میں 3 ٹیسٹ میچز اور 16 ون ڈے انٹرنیشنل میچز کھیلے ہیں، انہوں نے سال 2022 میں زمبابوے کے خلاف ٹی 20 انٹرنیشنل میچ بھی کھیلا تھا۔
