کراچی: آئندہ 3 سے 4 روز میں افغانستان سے ہزاروں افغان اور غیر ملکی باشندے، صوبہ سندھ کے دارالحکومت کراچی آئیں گے اور کچھ روز قیام کریں گے۔
تفصیلات کے مطابق کمشنر کراچی آفس نے ڈی جی رینجرز، آئی جی پولیس اور سیکریٹری ہیلتھ ڈپارٹمنٹ سمیت متعلقہ اداروں کو اہم مراسلہ روانہ کردیا۔
مراسلے میں کہا گیا کہ کور ہیڈ کوارٹر 5 میں افغانستان سے کراچی آنے والے افغان باشندوں اور غیر ملکیوں کے حوالے سے اجلاس ہوا، اجلاس کی صدارت چیف آف اسٹاف نے کی ہے۔
مراسلے کے مطابق اجلاس میں بتایا گیا کہ آئندہ 3 سے 4 روز میں افغانستان سے 2 ہزار کے قریب افغان باشندے اور غیر ملکی کراچی آئیں گے اور کچھ روز قیام کریں گے۔
اجلاس میں کہا گیا ہے کہ ڈپٹی کمشنر ملیر جناح انٹرنیشنل ایئرپورٹ کے احاطے میں ہنگامی بنیادوں پر انتظامات کریں، ڈپٹی کمشنر ملیر پی ڈی ایم اے اور قانون نافذ کرنے والے اداروں کی مدد سے ٹرانزٹ کے طور پر افغانستان سے کراچی آنے والوں کی سیکیورٹی، بورڈنگ، ٹرانسپورٹ اور دیگر سہولیات کے لیے انتظامات کریں۔
مراسلے میں ہدایت کی گئی کہ ایئرپورٹ اور رامادہ ہوٹل سمیت ایئرپورٹ کے قریب ان کی رہائش کے لیے نشاندہی کی گئی ہے، محکمہ صحت موبائل یونٹس، ایمبولینس اور میڈیکل عملے کو نشاندہی کیے گئے مقامات پر ڈپٹی کمشنر ملیر کے ساتھ مل کر تعینات کریں۔
اجلاس میں کہا گیا کہ کے الیکٹرک رہائش کے لیے نشاندہی کیے گئے مقامات پر بجلی کی بلا تعطل فراہمی کو یقینی بنائے، جو مسافر نشاندہی کیے گئے ہوٹلز میں قیام کریں گے وہ اپنا خرچہ خود اٹھائیں گے۔
