دبئی : پٹرولنگ پر مامور شرطہ آفیسر کی جانب سے افریقی خاتون سے شناخت نامہ طلب کرنے پر خاتون نے سخت مزاحمت کرتے ہوئے افسر کو دانت کاٹ لیا۔
تفصیلات کے مطابق مذکورہ واقعہ نائف میں پیش آیا جہاں یوگنڈہ سے تعلق رکھنے والی سیاہ فام خاتون نے شناختی دستاویزات طلب کرنے پر پولیس افسر کو دانت کاٹ لیا اور خاتون پولیس افسر سمیت تین مرد افسران کے ساتھ مزاحمت بھی کی۔
پولیس افسران نے خاتون کو مزاحمت کرنے اور پولیس افسر کو زخمی کرنے کی کوشش میں حملہ کرنے کا مقدمہ درج کرکے ملزمہ کو گرفتار کرکے تھانے منتقل کردیا گیا جہاں خاتون نے اعتراف جرم کرتے ہوئے بتایا کہ غلط فہمی کی وجہ سے یہ واقعہ پیش آیا۔
عدالت میں اپنا بیان قلم بند کرواتے ہوئے افریقی خاتون نے کہا کہ پولیس افسر نے اچانک شناختی دستاویزات طلب کیں جس سے میں ڈر گئی اور میں سمجھی کہ یہ جنسی طور پر ہراساں کیے جانے کی کوشش ہے جس پر اپنے دفاع کرتے ہوئے مزاحمت کی اور افسر کے ہاتھ پر کاٹ لیا۔
پولیس افسر نے عدالت کو بتایا کہ اپنے ساتھی افسران جن میں خاتون پولیس اہلکار بھی شامل تھی کے ساتھ ایک جرائم پیشہ گروہ کی گرفتاری کے لیے فریج نصیر کے علاقے پہنچے تھے جہاں خاتون کو مشکوک پایا تو سفری دستاویزات اور شناختی کارڈ طلب کیں جس پر تعاون کرنے کے بجائے خاتون نے مزاحمت کا راستہ اپنایا۔
پولیس افسر نے مزید بتایا کہ ملزمہ کو گرفتار کر کے نائف پولیس اسٹیشن منتقل کردیا گیا تھا جب کہ دیگر پولیس افسران نے بھی عدالت میں اس بات کی شہادت دی کہ ملزمہ نے دستاویزات طلب کرنے پر سخت ردعمل دیتے ہوئے مزاحمت کی اور پولیس افسر کے ہاتھ پر کاٹ انہیں زخمی کردیا تھا۔
