اسلام آباد: وزیراعظم عمران خان کا کہنا ہے کہ معیشت کے استحکام کے بعد توجہ عوام کو ریلیف کی فراہمی پر ہے۔
تفصیلات کے مطابق وزیراعظم عمران خان سے ہزارہ ڈویژن سے تعلق رکھنے والے ارکان اسمبلی نے ملاقات کی۔ ممبران نے درپیش مسائل اور ترقیاتی منصوبوں کی ضرورتوں سے وزیراعظم کو آگاہ کیا۔
اس موقع پر وزیراعظم عمران خان کا کہنا تھا کہ نہایت مشکل اور نامساعدمعاشی حالات میں حکومت کی باگ ڈور سنبھالی، معیشت کے استحکام کے بعد توجہ عوام کو ریلیف کی فراہمی پر ہے۔
وزیراعظم نے کہا کہ حکومت مہنگائی پر قابو کے لیے انتظامی طور پر ہرممکنہ اقدام اٹھا رہی ہے، طلب ورسد سے متعلق جامع منصوبہ بندی پر توجہ دی جا رہی ہے۔
انہوں نے کہا کہ ماضی میں بجلی وگیس منصوبوں میں سیاسی وابستگیوں کو بنیاد بنایا جاتا تھا، غلط پالیسیوں کی وجہ سے نقصانات پر قابوکی کوشش کر رہے ہیں، پاکستان میں سیاحتی شعبے کو ترقی دینےکی بے انتہا صلاحیت موجود ہے۔
وزیراعظم پاکستان کا کہنا تھا کہ حکومت سیاحت کے فروغ پر خصوصی توجہ دے رہی ہے، نوجوانوں کے لیے نوکریوں کے مواقع اور دیگرمعاشی فوائدحاصل کریں گے، قدرتی حسن اور ماحولیات کا تحفظ بھی یقینی بنایا جا سکےگا۔
