شوبز انڈسٹری کی مقبول ترین جوڑی افضل خان عرف ریمبو اور صاحبہ اپنی کامیاب ازدواجی زندگی کے باعث بہت سی شوبز جوڑیوں کیلئے متاثرکُن شخصیت ہیں۔
اس کامیاب جوڑی نے اے آر وائی ڈیجیٹل کے پروگرام ‘ گڈ مارننگ پاکستان’ میں اپنی فیملی کے ساتھ شرکت کی اور میزبان کی جانب سے پوچھے گئے سوالات کے خوبصورت جواب دئیے۔
افضل خان اور صاحبہ نے بیٹوں سے متعلق بتایا کہ احسن نے بچپن میں بہت زیادہ تنگ کیا، رات بھر سونے نہیں دیتا تھا جبکہ زین پرسکون نیند لیتا تھا مگر دن میں اپنی ساری کسر پوری کرلیتا تھا۔
اپنے بیٹوں زین اور احسن خان کی عادات سے متعلق صاحبہ نے بتایا کہ احسن بہت زیادہ خیال رکھنے والا بیٹا ہے رات کو سوتے وقت میرے پاؤں لازمی دباتا ہے۔
گفتگو کے دوران افضل خان عرف ریمبو نے ازراہ مذاق کہا کہ میں بھی ساتھ ہی بیٹھا ہوتا ہوں مگر ان دونوں نے آج تک ہاتھ نہیں لگایا، اس موقع پر میں صرف یہ مس کرتا ہوں کہ اللہ نے مجھے بیٹی دی ہوتی تو، خود صاحبہ نے بھی ریمبو کی بات کی تائید کرتے ہوئے کہا کہ یہ بیٹی کو بہت مس کرتے ہیں۔
