The news is by your side.

Advertisement

آغا سراج درانی یکم مارچ تک جسمانی ریمانڈ پر نیب کے حوالے

آغا سراج کو آمدن سے زائد اثاثوں کے الزام میں گرفتار کیا گیا ہے

کراچی: آمدن سے زائد اثاثے رکھنے کے الزام میں گرفتار ہونے والے اسپیکر سندھ اسمبلی آغا سراج درانی کو احتساب عدالت نے یکم مارچ تک جسمانی ریمانڈ پرنیب کے حوالے کردیا۔

تفصیلات کے مطابق قومی احتساب بیورو نیب کی جانب سے پیپلزپارٹی کے رہنما آغا سراج درانی کو احتساب عدالت نمبر 3 میں پیش کیا گیا۔

عدالت میں سماعت کے دوران تفتیشی افسر نے دلائل دیتے ہوئے کہا کہ پہلا ریمانڈ ہے، 14 روزہ ریمانڈ مانگ رہے ہیں، نیب قانون میں 90 روزہ ریمانڈ ہوسکتا ہے۔

ایڈووکیٹ شہاب سرکی نے کہا کہ گھرمیں جس طرح کارروائی کی گئی وہ نامناسب ہے، آغا سراج درانی بیمارہیں، دو اتک نہیں دی گئی۔

تفتیشی افسر نے کہا کہ ہمارے پاس ڈاکٹرزموجود ہیں، ملزم کا میڈیکل کرایا گیا ہے، آغا سراج درانی نے کہا کہ گھرسے کیا لے گئے ہیں اورکیا اپنے پاس سے شامل کریں گے، معلوم نہیں ہے۔

بعدازاں احتساب عدالت نے آمدن سے زائد اثاثے رکھنے کے الزام میں گرفتار ہونے والے اسپیکر سندھ اسمبلی آغا سراج درانی کو یکم مارچ تک جسمانی ریمانڈ پرنیب کے حوالے کردیا۔

آغا سراج درانی کی پیشی کے موقع پر سیکیورٹی کے انتہائی سخت انتظامات کیے گئے، عدالت کے باہر پولیس اہلکاروں کی بھاری نفری تعینات تھی۔

احتساب عدالت انتظامیہ کا کہنا تھا کہ بتایا جائے کیا پولیس صورت حال کنٹرول کرسکتی ہے، رینجرزکی معاونت درکار ہوتو بھی بتایا جائے۔

عدالت انتظامیہ نے کہا تھا کہ صورت حال قابومیں نہ رہے تورینجرزطلب کی جا سکتی ہے، احتساب عدالت کی ہدایت کے بعد تھانہ پریڈی سے اضافی نفری طلب کرلی گئی۔

دوسری جانب پیپلزپارٹی کے رہنما اور کارکنان بڑی تعداد میں احتساب عدالت پہنچے۔ نیب نے اسپیکر سندھ اسمبلی آغا سراج درانی کو گزشتہ روز اسلام آباد کے نجی ہوٹل سے گرفتار کیا تھا۔

بعدازاں نیب کی جانب سے آغا سراج درانی کو راہداری ریماند کے لیے عدالت میں پیش کیا گیا تھا۔ نیب نے موقف اپنایا تھا کہ اسپیکرسندھ اسمبلی کے خلاف کراچی میں اثاثہ جات ریفرنس زیرسماعت ہے۔

عدالت نے آغا سراج درانی کا 3 روزہ راہداری ریمانڈ منظور کرتے ہوئے انہیں کراچی کی متعلقہ عدالت میں پیش کرنے کا حکم دیا تھا۔

نیب نے گرفتار آغا سراج درانی کو گزشتہ روز اسلام آباد سے نجی ایئرلائن کی پرواز کے ذریعے کراچی ایئرپورٹ پہنچایا تھا جہاں سے انہیں سخت سیکیورٹی میں ہیڈ آفس منتقل کردیا گیا تھا۔

نیب نے اسپیکرسندھ اسمبلی آغاسراج درانی کو گرفتار کرلیا

یاد رہے اپریل 2018 میں چیئرمین نیب جسٹس (ر) جاوید اقبال نے اسپیکر سندھ اسمبلی آغا سراج کے خلاف تحقیقات کا حکم دیتے ہوئے کہا تھا کہ آغا سراج درانی کے خلاف آمدن سے زائد اثاثوں کی چھان بین ہوگی۔

سابق اسپیکر سندھ اسمبلی آغا سراج درانی کے خلاف تین انکوائریز کا حکم دیا گیا تھا، جن میں آمدن سے زائد اثاثوں، غیر قانونی بھرتیوں اور ایم پی اے ہاسٹل، سندھ اسمبلی بلڈنگ کی تعمیر میں کرپشن شامل ہیں۔

دوسری جانب سندھ حکومت نے آغا سراج درانی کی گرفتاری پر انتہائی شدید ردعمل کا اظہار کیا ہے۔ سابق صدر زرداری کا کہناتھا کہ جیل ہمارا گھر ہے، بلاول بھٹو نے اسے وفاقی اکائی پر حملہ قرار دیا تھا۔

Comments

comments

یہ بھی پڑھیں