سکھر/حیدر آباد/ کراچی: جعلی اکاؤنٹس کیس میں اسلام آباد ہائی کورٹ کی جانب سے آصف زرداری کی ضمانت مسترد کیے جانے کے بعد نیب نے انھیں گرفتار کر لیا، جس پر جیالوں نے سندھ بھر میں شدید احتجاج شروع کر دیا ہے۔
تفصیلات کے مطابق سکھر میں سابق صدر کی گرفتاری پر جیالے سڑکوں پر نکل آئے، ڈنڈا بردار جیالوں نے مختلف بازاروں میں گشت گیا اور دکانیں زبردستی بند کرا دیں، پولیس ڈنڈا بردار جیالوں کو روکنے کی کوشش کرتی رہ گئی۔
ادھر سکھر میں پی پی کارکنان نے سندھ پنجاب قومی شاہراہ بھی بلاک کر دی، کارکنان اور جیالوں نے ہاتھوں میں پارٹی پرچم اٹھا رکھے تھے، قومی شاہراہ بلاک ہونے سے گاڑیوں کی قطاریں لگ گئیں اور مسافروں کو شدید مشکلات کا سامنا کرنا پڑا، علی واہن شاہراہ پر پی پی کارکنان نے ٹائرز جلا کر سڑک بلاک کر دی، دریں اثنا، سکھر میں رکاوٹیں ہٹا کر سندھ پنجاب شاہراہ کھول دی گئی۔
سندھ کے شہر حیدر آباد میں بھی آصف زرداری کی گرفتاری کے خلاف جیالوں نے احتجاج کیا، اور ڈسٹرکٹ کونسل کے سامنے ٹائر جلا کر ٹریفک معطل کر دیا گیا، دادو میں بھی آصف زرداری کی گرفتاری کے خلاف پی پی کارکنان نے احتجاج کیا۔
لاڑکانہ میں پی پی کارکنوں نے جناح باغ چوک پر ٹائر جلا کر احتجاج کیا اور ٹریفک معطل ہو گیا، جناح باغ چوک کے اطراف دکانیں اور پٹرول پمپ بھی بند کرائے گئے، شہر میں ہوائی فائرنگ بھی کی گئی، مختلف علاقوں میں کاروبار بند کیا گیا اور کارکنوں نے باغ جناح چوک پر دھرنا دیا، ڈنڈا بردار جیالوں نے کاروباری مراکز میں توڑ پھوڑ کی۔
یہ بھی پڑھیں: جعلی اکاؤنٹس کیس ، نیب نے سابق صدر آصف زرداری کو گرفتار کرلیا
ادھر شہر قائد کے مختلف علاقوں میں ٹریفک جام ہو گیا، ٹریفک پولیس حکام ایمرجنسی صورت حال پر قابو پانے میں نا کام رہے، صدر، ایمپریس مارکیٹ، گرو مندر، ایم اے جناح روڈ، ٹاور، جامع کلاتھ، اولڈ سٹی ایریا، نمائش، تین ہٹی سمیت دیگر علاقوں میں ٹریفک جام ہوا۔
ہوٹل میٹرو پول سے اسٹار گیٹ تک ہزاروں گاڑیاں پھنسی رہیں، اختر کالونی سے کالا پل صدر تک بھی ٹریفک جام رہا، تمام فلائی اوورز اور انڈر پاسز میں بھی ٹریفک جام رہا۔
آئی جی سندھ ڈاکٹر کلیم امام نے اس صورت حال پر ہدایت جاری کی کہ سندھ میں پر امن احتجاجی شرکا کی سیکورٹی کو یقینی بنایا جائے، اور قانون شکن عناصر کی نگرانی اور مؤثر اقدامات کو ممکن بنایا جائے۔ انھوں نے سرکاری اور نجی املاک کی سلامتی کو بھی یقینی بنانے کی ہدایت جاری کی۔
