مظفرآباد: شاعراحمد فرہاد سے ان کی فیملی کی ملاقات کرادی گئی، قانون کی خلاف ورزی پر احمد فرہاد پولیس کی حراست میں ہیں۔
تفصیلات کے مطابق مظفرآباد آزاد کشمیر میں لاپتہ ہونے والے شاعراحمد فرہاد سے ان کی فیملی کی ملاقات ہوگئی ، ان کی فیملی کافی دیر تک ان کے ساتھ رہی۔
حکومت آزاد کشمیر کی جانب سے گرفتار شاعر سے ان کی فیملی کو ملاقات سے نہیں روکا گیا، سوشل میڈیا پر فیملی کو ان سے نہ ملنے دینے کی خبریں محض پروپیگنڈا ہیں۔
ترجمان کا کہنا تھا کہ آزادکشمیر میں لاپتہ افراد یا گمشدگی کا کوئی تصور نہیں، وہ قانون کی خلاف ورزی پر پولیس کی حراست میں ہیں۔
گذشتہ روز اسلام آباد ہائی کورٹ میں احمد فرہاد کی بازیابی کیس سے متعلق سماعت ہوئی تھی، جس میں اٹارنی جنرل نے عدالت کو بتایا تھا احمد فرہاد گرفتار اور پولیس کسٹڈی میں ہے۔
تھانہ دھیر کوٹ کشمیرکی رپورٹ عدالت کے سامنے پیش کردی گئی ،جس پر جسٹس محسن اخترکیانی نے ریمارکس دیے لاپتا افراد سے متعلق فائل لارجر بینچ بنانے کیلئے بھجوادوں گا اور سماعت ملتوی کردی گئی۔
پولیس نے بتایا تھا کہ شاعر احمد دفعہ اے پی سی 186کے تحت گرفتار ہوئے، ایف آئی آر میں کہا گیا ہے کہ وہ صبح7 بجے گجر کوہالہ کے مقام سے آزاد کشمیرمیں داخل ہو رہے تھے، دوران چیکنگ وہ شناختی کارڈ نہیں دکھاسکے۔
ایف آئی آر کے متن کے مطابق شاعر کارسرکار میں مداخلت کے جرم میں گرفتار ہوئے، وہ ایک اور مقدمے میں مظفرآباد پولیس کو بھی مطلوب ہیں، اس لیے ان کو مظفرآباد پولیس کے حوالے کردیا گیا ہے۔
