اسلام آباد: وفاقی وزیر داخلہ احسن اقبال کا کہنا ہے کہ خوشی کی بات ہے پاکستان میں جنسی امتیاز کا فرق ختم ہو رہا ہے۔ کوشش ہے نوجوان مستقبل کے چیلنجز سے نمٹ سکیں۔
تفصیلات کے مطابق کونسل آف آرٹس میں ہیومن ڈویلپمنٹ رپورٹ کی تقریب منعقد ہوئی۔ وفاقی وزیر داخلہ احسن اقبال نے تقریب سے خطاب کیا۔
اپنے خطاب میں ان کا کہنا تھا کہ خوشی کی بات ہے پاکستان میں جنسی امتیاز کا فرق ختم ہو رہا ہے۔ جو بڑا سوچتا ہے وہ اچھے مستقبل کا خواب دیکھتا ہے، جو برا سوچتا ہے وہ خود کو خراب کرتا ہے۔
انہوں نے کہا کہ بدقسمتی سے معاشرے میں مایوسی تیزی سے بڑھنے لگی ہے۔ پاکستان کو چیلنجز کا سامنا ہے اس سے کسی کو انکار نہیں۔ ’میرا تعلق پسماندہ علاقے سے ہے جہاں پہلے تعلیم کا فقدان تھا، اب وہاں 80 فیصد لڑکیوں نے ترقی کی ہے‘۔
ان کا کہنا تھا کہ لڑکیاں روشن مستقبل میں اچھا کردار ادا کر رہی ہیں۔ نوجوانوں کو ذہنی نشوونما، تفریح کے مواقع بھی فراہم کرنے چاہئیں۔ کوشش ہے نوجوان مستقبل کے چیلنجز سے نمٹ سکیں۔
احسن اقبال نے کہا کہ یونیورسٹی میں داخلہ لینے والا ہر طالب علم آسان اقساط پر لیپ ٹاپ حاصل کر سکے گا۔ طلبا و طالبات کے لیے اسمارٹ کیمپس پر توجہ دے رہے ہیں۔ نوجوان مستقبل کے چیلنجز سے نمٹنا جانتے ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
