قرضےترقی کیلئےہیں عیاشی کیلئے نہیں، احسن اقبالahsan iqbal
The news is by your side.

Advertisement

قرضےترقی کیلئےہیں عیاشی کیلئے نہیں، احسن اقبال

لاہور : وفاقی وزیر داخلہ احسن اقبال نے کہا ہے کہ قرضے ترقی کیلئے ہیں عیاشی کیلئے نہیں، چند ناکام سیاستدان اور ریٹائرڈ فوجی افسران حکومت کے خلاف تبصرے کر رہے ہیں، بعض صحافی نون لیگ اور فوج کے درمیان جنگ کروانا چاہتے ہیں۔

ایکسپو سنٹر لاہور میں تین روزہ سیکنڈ انٹر نیشنل بزنس اینڈ ایگزیبیشن کی افتتاحی تقریب سے خطاب کرتے ہوئے وزیر داخلہ احسن اقبال کا کہنا تھا کہ پاکستان تیزی سے ابھر رہا ہے، کچھ کمپنیاں ترقی نہ اپنانے پر پیچھے رہ گئیں ہیں۔

احسن اقبال کا کہنا تھا کہ پاکستان کی جامعات کو ترقی کے لئے آگے چلنا ہوگا، ہر کاروبار کو بدلتے حالات سے ہم آہنگ کرنے کی ضرورت ہے، سی پیک نے بہت شاندار ترقی کے دروازے کھولے ہیں، پاکستانی سقراط اور بقراط کے نظریئے سے دور رہیں کیونکہ یہ ترقی کے دشمن ہیں، رات 8 اور10 بجے کے ٹاک شوز نہ دیکھیں، اس سے کچھ حاصل نہیں ہو گا۔

وزیر داخلہ کا کہنا تھا کہ چند سیاستدان ملک میں ترقی نہیں دیکھنا چاہتے، کچھ لوگ شیخ چلی کے خواب والے دور میں زندگی گزار رہے ہیں، 2013 کے مقابلے میں 2017 ترقی کی منازل طے کرتا ملک بن گیا ہے۔

انہوں نے کہا کہ اقتدار کے وقت ملک کو بجلی کے بحران سمیت کئی چیلنجز کا سامنا تھا، اب پاکستان دنیا میں کم لاگت والا بہترین ملک بن گیا ہے۔ بین الاقوامی سروے کے مطابق پاکستان کی ترقی کا سفر جاری رہا تو 2030 میں معاشی اعتبار سے 25 ویں نمبر پر ہوگا۔


مزید پڑھیں : توانائی منصوبوں کیلئے قرضہ نہیں لیا، ایک لیڈرمایوسی پھیلارہا ہے، احسن اقبال


احسن اقبال کا کہنا تھا کہ ملک میں مستحکم جمہوریت ہے، انتخابات اپنے وقت پر ہوں گے، قرضے عیاشی کے لئے نہیں، ملک کی ترقی اور انفرسٹرکچر کو بہتر بنانے کے لئے ہیں۔ انفراسٹرکچر سے توانائی کا بحران کم اور انڈسٹری ماڈرن بن رہی ہے۔

وزیر داخلہ نے کہا کہ جو عناصر ملک میں امن اور استحکام نہیں چاہتے وہ ملک کے دشمن ہیں، اداروں میں کسی بھی قسم کا ٹکراؤ نہیں چاہتے لیکن چند مایوس لوگوں کی یہ خواہش ہے۔ احسن اقبال نے کہا کہ چند ناکام سیاستدان اور ریٹائرڈ فوجی افسران حکومت کے خلاف تبصرے کر رہے ہیں، ن لیگ ملک کی سب سے بڑی سیاسی جماعت اور فوج طاقتور ادارہ ہے لیکن چند صحافی ان کے درمیان جنگ کروانا چاہتے ہیں جس میں وہ کامیاب نہیں ہوں گے۔

احسن اقبال نے دعوٰی کیا کہ اب ن لیگ پر نقب نہیں لگ سکتی کیونکہ یہ سیسہ پلائی دیوار بن چکی ہے، جنوبی پنجاب کے لوگ مسلم لیگ ن کے ساتھ ہیں، شیخ رشید کی سیاست ن لیگ سے چل رہی ہے، اس کے بغیر وہ سیاست نہیں کر سکتے۔


اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئر کریں۔

Comments

comments

یہ بھی پڑھیں