پاکستان کے معروف اداکار احسن خان نے شہباز حکومت کی جانب سے عوام کو چائے کم پینے کے مشورے پر اپنے ردعمل کا اظہار کیا ہے۔
فوٹو اینڈ ویڈیو شیئرنگ ایپلی کیشن انسٹا گرام پر احسن خان نے اسٹوری پر لکھا کہ ”لیکن میں تو چائے سے پیار کرتا ہوں اور دن میں کم از کم چار بار پیتا ہوں۔“
رواں ماہ وفاقی وزیر احسن اقبال نے قوم سے چائے کم پینے کی اپیل کرتے ہوئے کہا تھا کہ ادھار لے کر چائے امپورٹ کرتے ہیں جس سے معیشت کو نقصان ہوتا ہے۔
انہوں نے کہا کہ جب تک چائے کی پیداوار میں خود کفیل نہیں ہو جاتے قوم چائے کی ایک ایک دو دو پیالیاں کم کر دیں۔
احسن اقبال کے اس بیان کے بعد سوشل میڈیا پر صارفین کی جانب سے فوری طور پر ردعمل کا اظہار کیا گیا۔ ہر کوئی وفاقی وزیر کا بیان مسترد کرتا نظر آیا۔
بعض صارفین نے کہا کہ ہم ایک وقت کا کھانا چھوڑ سکتے ہیں لیکن چائے پر کوئی سمجھوتہ نہیں کریں گے۔
