بھارتی ایئرلائن ’ایئر انڈیا‘ نے خود کو عالمی سطح پر منوانے اور مارکیٹ میں مقابلے کے لیے اپنے توسیعی منصوبے کا اعلان کر دیا۔
بین الاقوامی میڈیا رپورٹس کے مطابق ایئرانڈیا نے مسافروں کو اپنی جانب راغب کرنے اور کمپنی کو فضائی سفر کے لیے پرُکشش بنانے کے لیے 70 ارب ڈالر خرچ کرنے کا فیصلہ کیا ہے۔
اس منصوبے میں نئے طیاروں کی خریداری، مسافروں کے لیے جدید سہولیات، طیاروں کے اندر روایتی ڈیزائن کی نشستوں کی تیاری شامل ہے۔
ایئرانڈیا بوئنگ اور ایئربس سے 470 جیٹ خریدے گا جس میں 220 بوئنگ اور 250 ایئربس شامل ہیں۔ کمپنی کو رواں سال کے آخر میں چھ نئے طیارے ملیں گے جو روسی ایئرلائن ایروفلوٹ سے تیار کروائے گئے ہیں۔
ایئرانڈیا کے سی ای او کیمبل ولسن کا کہنا ہے کہ رواں سال کے آخری تک مسافروں کو بڑی تبدیلی دیکھنے کو ملے گی اور 2024 کے آخر تک عوام کو بڑے پیمانے پر سہولیات فراہم کی جائیں گی جو کہ جدید اور اور بالکل نئی طرز کی ہوں گی۔
