پاکستان میں جیٹ فیول کی قیمت بڑھنے کے باعث ایئرلائنز نے کرایوں میں اضافہ کردیا۔
ایئر لائن ذرائع کا کہنا ہے کہ ملک میں جیٹ فیول کی قیمت بڑھنے کے باعث ایئرلائنز نے کرایوں میں اضافہ کیا ہے، ڈومیسٹک پروازوں پر 2800 سے 5 ہزار روپے فی ٹکٹ تک کا اضافہ کیا گیا ہے۔
کراچی سے لاہور اسلام آباد اور دیگر اسٹیشن کے لے کرایوں میں اضافہ کیا گیا ہے، بین الاقوامی پروازوں کے لیے 10 سے 28 ہزار روپے تک کا اضافہ کیا گیا ہے۔
پاکستان سے مشرق وسطیٰ اور وسط ایشیائی ملکوں کے لیے 15 ہزار روپے تک اضافہ کیا گیا ہے، پاکستان سے ٹورنٹو مانچسٹر کی پروازوں پر 28 ہزار روپے تک فی ٹکٹ اضافہ ہوا ہے۔
ایئرلائن ذرائع کے مطابق ٹورنٹو، مانچسٹر کی اکنامی کلاس کا یکطرفہ کرایہ ڈھائی لاکھ روپے سے تجاوز کرگیا ہے۔
واضح رہے کہ چند روز قبل پاکستان میں طیاروں کے جیٹ فیول کی قیمت میں 154 روپے فی لیٹر اضافہ کیا گیا تھا۔ جیٹ فیول کی قیمت میں اضافے کے بعد 342 روپے فی لیٹر ہوگئی تھی۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں