ایئر سیال کی کراچی سے اسلام آباد جانے والی پرواز حادثے سے بال بال بچ گئی۔
تفصیلات کے مطابق کراچی سے اسلام آباد جانے والی پرواز پی ایف 125 خراب موسم کے باعث آدھے گھنٹے تک ہچکولے کھاتی رہی۔ کپتان نے خراب موسم کے باعث پرواز کو اسلام آباد نہ لے جانے کا فیصلہ کیا اور طیارے کو بحفاظت سیالکوٹ ایئرپورٹ پر لینڈ کروا لیا۔
سیالکوٹ ایئرپورٹ پر لینڈ ہونے کے بعد مسافروں نے ایئر سیال کی پرواز میں مزید سفر سے انکار کر دیا جب کہ نجی ایئر لائن نے سفر پر اصرار کیا۔
ایئرلائن نے سیالکوٹ ایئرپورٹ پر مسافروں کو طیارے سے باہر نکلنے سے روکا تو مسافر اپنی نشستوں سے کھڑے ہو گئے اور احتجاج کرنے لگے۔
مسافروں کا کہنا تھا کہ انہیں طیارے سے باہر نکلنے دیا جائے کیونکہ وہ اس پرواز کے ذریعے اسلام آباد نہیں جانا چاہتے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں