لاہور: پاکستانی ٹینس اسٹار اعصام الحق نے فرانس کی سرزمین پر فرنچ صدر ایمانویل میکرون کے خلاف احتجاج کا فیصلہ کرلیا۔
تفصیلات کے مطابق پاکستانی ٹینس اسٹار اعصام الحق نے پیرس ماسٹر ٹینس ٹورنامنٹ میں گستاخانہ خاکوں کے خلاف احتجاج کرنے کا اعلان کردیا، وہ پر امن احتجاج کے طور پر پیرس ماسٹر میں میچز کے دوران بازو پر سفید پٹی باندھ کر کھیلیں گے۔
اعصام الحق نے دنیا بھر کے ایتھلیٹس سے اپیل کی کہ اس گستاخی کے خلاف سب سفید پٹی باندھ کر مل کر احتجاج ریکارڈ کروائیں۔
ویسے تو یہ عام ٹینس میچ ہوگا لیکن اعصام اس میں پوری دنیا کو ایک پیغام دیں گے کہ اسلام سمیت کسی بھی مذہب کی توہین کوئی بھی کھلاڑی قبول نہیں کرے گا۔
انسٹاگرام پر جاری اپنے ویڈیو بیان میں اعصام کا کہنا ہے کہ میں نے بطور ایتھلیٹ ایک سبق سیکھا ہے اور وہ ہے سب کا احترام کرنا، اظہار رائے کی ازادی کا مقصد یہ نہیں کہ کسی کے عقیدے یا مذہب کی توہین کی آزادی ہو۔
اعصام الحق کاکہنا ہے کہ یہ افسوس کی بات ہے کہ فرانس کا سربراہ مملکت ایسے عمل کی حمایت اور حوصلہ افزائی کررہا ہے جو گستاخانہ ہیں، اسلام صرف اور صرف امن اور سب کے احترام کا درس دیتا ہے۔
واضح رہے کہ اعصام الحق پیرس ماسٹر ٹینس میں مینز ڈبل میں ایکشن میں دکھائی دیں گے۔