لاہور :پاکستانی اداکارہ اور میزبان عائشہ ثناء کے خلاف لاہور کے تھانے میں چیک باؤنس ہونے کا مقدمہ درج کرلیا گیا۔
نمائندہ اے آر وائی نیوز کے مطابق ٹی وی اداکارہ و میزبان عائشہ ثناء پر متعدد لوگوں نے غبن کا الزام عائد کرتے ہوئے دعویٰ کیا کہ اداکارہ کروڑوں روپے کا فراڈ کرکے روپوش ہوگئیں ہیں۔
متاثرین کا کہنا ہے کہ عائشہ تین دن سے مفرور ہیں اور وہ کسی کا فون بھی نہیں اٹھا رہیں۔ میاںعلی معین نامی شہری نے اداکارہ کے خلاف چیک باؤنس ہونے کا مقدمہ تھانہ ڈیفنس بی میں درج کروایا۔
میاں علی معین نے مؤقف اختیار کیا کہ اداکارہ عائشہ ثناء نے اُن سے 20لاکھ روپے لیے اور پھر رقم کی واپسی کے تقاضے پر حیلے بہانے پیش کیے، کئی بار بولنے کے بعد اداکارہ نے بیس لاکھ روپے کا چیک تھمایا جسے بینک نے باؤنس کردیا اور بتایا کہ اکاؤنٹ میں رقم موجود نہیں ہے۔
پولیس نے مقدمہ درج کرکے تفتیش کا آغاز کردیا ہے۔ انچارج انویسٹی گیشن ڈیفنس بی کے مطابق ملزمہ عائشہ ثناء مقدمہ درج ہونے کے بعد روپوش ہو گئی ہیں، اُن کی جلد گرفتاری کو ممکن بنایا جائے گا۔
درخواست گزار کے مطابق عائشہ ثناء نے اور بھی کئی لوگوں سے پیسے لے کر جعلی چیک تھما دیئے۔ عائشہ ثناء نے گھریلو ضروریات اور”کمیٹی” کے لئے اپنے کئی دوستوں اور جاننے والوں سے لگ بھگ 6 کروڑ روپے جمع کئے۔
متاثرہ شہری نے دعویٰ کیا کہ عائشہ ثناء کو رقم ادھار دینے والے ان کی تلاش میں مارے مارے پھر رہے ہیں جبکہ پولیس بھی ان کی گرفتاری کیلئے کوشاں ہے۔
