The news is by your side.

Advertisement

مریم نواز جیت کر وزیر اعظم یا اپوزیشن لیڈر بن سکتی ہیں، اعتزاز احسن

لاہور: پیپلز پارٹی کے مرکزی رہنما اعتزاز احسن نے کہا ہے کہ ہوسکتا ہے مریم نواز جیت کر ملک کی وزیر اعظم یا اپوزیشن لیڈر بن جائیں، انھوں نے سب کو پیچھے چھوڑ دیا ہے۔

ان خیالات کا اظہار انھوں نے اے آر وائی نیوز کے پروگرام پاور پلے میں گفتگو کرتے ہوئے کیا، ان کا کہنا تھا کہ ذاتی طور پر مریم نواز پاکستان کی سیاست میں ابھر کر سامنے آئی ہیں۔

چوہدری اعتزاز احسن نے کہا کہ نواز شریف نہیں چاہتے مریم بی بی الیکشن سے پہلے نا اہل ہوجائیں، میرے خیال میں مریم نواز شہباز شریف سے زیادہ مضبوط ہیں، انھوں نے مامے چاچے کو پیچھے چھوڑ دیا ہے۔

پی پی کے رہنما نے کہا کہ میاں صاحب سائنسی طریقے سے گیم کھیل رہے ہیں، بہ ظاہر لگتا ہے وہ کلثوم نواز کی بیماری کی وجہ سے لندن میں ہیں مگر وہ اس گیم میں بال کی طرح لگتی ہیں۔

میاں صاحب ایک اور سطح پر اس ریجن کی سیاست کر رہے ہیں، ریجن سطح کی اس سیاست میں مودی اور ٹرمپ دونوں موجود ہیں، امریکا برطانیہ کے بغیر اس خطے میں سیاست نہیں کرتا۔

ٹوبہ ٹیک سنگھ میں بھی کراچی سے اچھی بسیں ہیں، شہباز شریف


اعتزاز احسن نے کہا کہ شہباز شریف اندرونی معاملات کے کھلاڑی ہیں، انھوں نے کراچی جا کر اردو بولنے والوں کا مزاق اڑایا، ہم ایم کیو ایم کو اردو بولنے والوں سے علیحدہ سمجھتے تھے، پیپلز پارٹی نے کبھی بھی اردو بولنے والوں کی اس طرح تضحیک نہیں کی، اردو بولنے والے کراچی کی ثقافت کی ترجمانی کرتے ہیں۔

پی پی رہنما کا کہنا تھا کہ ایسا لگتا ہے ہارلے اسٹریٹ کلینک شریف خاندان کی پراپرٹی ہو، اس کے ارد گرد انھوں نے ایک پردہ رکھا ہوا ہے، یہاں کوئی اور مریض آتا جاتا نظر نہیں آتا۔ ایک ملزم کے دو بیٹے مفرور ہیں جب کہ ملزم خود بھی لندن جا کر مفرور بیٹوں کے گھر رہتا ہے۔

اعتزاز احسن نے کہا آسمانوں کے مشورے الیکٹبلز کے حوالے سے بھی یقیناً ہوں گے، پارٹی چھوڑنے والوں کو شاید دوسری جگہ پناہ کا اشارہ ملا ہے، دو سے تین بار سنجیدگی سے الیکشن لڑنے والوں کو اس سسٹم کا تجربہ ہو جاتا ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں