ممبئی: بالی ووڈ اداکار اکشے کمار کی والدہ آرونہ بھاٹیہ دار فانی سے کوچ کرگئی۔
اکشے کمار نے سماجی رابطے کی ویب سائٹ پر اپنی والدہ کے انتقال کی تصدیق کرتے ہوئے انہیں خراج عقیدت بھی پیش کیا۔
انہوں نے اپنے انسٹاگرام اکاؤنٹ پر شیئر کی جانے والی پوسٹ میں لکھا ’ماں میرا سب کچھ تھی، آج ایسا محسوس ہورہا ہے کہ میں اپنا وجود کھو بیٹھا، والدہ آج دنیا چھوڑ کر دوسری دنیا چلی گئیں جہاں وہ والد سے ملیں گی‘۔
اکشے کمار برطانیہ میں اپنی نئی فلم کی شوٹںگ میں مصروف تھے، والدہ کی طبعیت کا سُن کر وہ تمام مصروفیات ترک کر کے ممبئی پہنچ گئے تھے۔
یاد رہے کہ اکشے کمار اپنی والدہ سے بہت زیادہ محبت کرتے تھے، وہ اپنی مصروفیات میں سے لازمی وقت نکال کر والدہ سے ملاقات کرتے اور اُن کے ساتھ وقت گزارتے تھے، گزشتہ برس ماؤں کے عالمی دن کے موقع پر اکشے کمار والدہ کو اُن کی پسندیدہ جگہ سنگاپور لے کر گئے تھے۔
View this post on Instagram
ابھی تک یہ بات سامنے نہیں آسکی کہ آرونہ بھاٹیہ کے انتقال کا سبب کیا بنا البتہ اہل خانہ نے صرف یہ بتایا کہ وہ گزشتہ کئی روز سے شدید علیل تھیں اور عمر رسیدہ ہونے کی وجہ سے تکالیف کا شکار بھی تھیں۔
