The news is by your side.

Advertisement

العزیزیہ، ایون فیلڈ ریفرنسز، نواز شریف کو اشتہاری قرار دینے کا فیصلہ

اسلام آباد: العزیزیہ اور ایون فیلڈ ریفرنسز میں عدالت نے سابق وزیر اعظم نواز شریف کو اشتہاری قرار دینے کا فیصلہ کر لیا ہے۔

تفصیلات کے مطابق اسلام آباد ہائی کورٹ نے نواز شریف کی ضمانت دینے والوں کو نوٹسز جاری کرتے ہوئے العزیزیہ اور ایون فیلڈ ریفرنسز میں سابق وزیر اعظم کو اشتہاری قرار دینے کا فیصلہ کر لیا۔

ہائی کورٹ کا کہنا تھا کہ آج نواز شریف کو اشتہاری قرار دینے کا مختصر حکم جاری کریں گے۔

عدالت نے کیس کی سماعت کے دوران نیب پراسیکیوٹر سے استفسار کیا کہ کیا العزیزیہ ریفرنس میں نواز شریف کی اپیل الگ رکھی جائے یا ساتھ؟ نیب پراسیکیوٹر نے کہا کہ العزیزیہ ریفرنس اپیل مکمل طور پر الگ ہے، اس لیے اسے الگ ہی دیکھنا چاہیے۔

دریں اثنا، عدالت نے نواز شریف کی ضمانت کے لیے مچلکے جمع کرانے والوں کو نوٹسز جاری کر دیے۔

غیرقانونی پلاٹس الاٹمنٹ کیس : نواز شریف اشتہاری قرار، ناقابل ضمانت وارنٹ گرفتاری جاری

یاد رہے کہ گزشتہ ماہ لاہور کی احتساب عدالت نے غیر قانونی پلاٹس الاٹمنٹ کیس میں نواز شریف کو اشتہاری قرار دیتے ہوئے ناقابل ضمانت وارنٹ جاری کیے تھے اور نواز شریف کی جائیداد قرق کرنے کا بھی حکم دے دیا تھا۔

ستمبر میں اسلام آباد کی احتساب عدالت نے توشہ خانہ ریفرنس میں سابق وزیر اعظم نواز شریف کو اشتہاری قرار دیا تھا، جب کہ یوسف رضا گیلانی اور آصف زرداری پر فرد جرم عائد کی گئی تھی۔

Comments

یہ بھی پڑھیں