لاہور : احتساب عدالت نے شراب لائسنس اجراء کیس میں نیب کی سابق ڈی جی ایکسائز اشرف گوندل کے مزید جسمانی ریمانڈ کی استدعا مسترد کرتے ہوئے جوڈیشل ریمانڈ پر جیل بھیج دیا۔
تفصیلات کے مطابق احتساب عدالت کے جج امجد نذیر چوہدری نے شراب لائسنس اجراء کیس کی سماعت کی، نیب کی جانب سے ملزم اشرف گوندل کے مزید پندرہ روزہ جسمانی ریمانڈ کی استدعا کی گئی۔
نیب پراسیکیوٹر نے موقف اختیار کیا کہ ملزم سے ابھی تفتیش کرنا باقی ہے ، ملزم سے ایف بی آر کا ریکارڈ منگوایا ہے، ملزم کے وکیل نے مزید جسمانی ریمانڈ کی مخالفت کرتے ہوئے کہا کہ ملزم مسلسل انکوائری میں شامل ہوتا رہا، ملزم کا کنڈکٹ ایسا نہیں کہ اسے جسمانی ریمانڈ پر نیب کی تحویل میں دیا جائے، ملزم نے جو ٹھیکہ پاس کیا، اس کا این او سی موجود ہے۔
عدالت نے سابق ڈی جی ایکساٸز ملزم اشرف گوندل کے جسمانی ریمانڈ کی استدعا مسترد کرتے ہوئے جوڈیشل ریمانڈ پر جیل بھجوا دیا۔
خیال رہے شراب لائسنس کیس میں نیب نے سابق ڈی جی ایکسائزاکرم اشرف گوندل کی بدعنوانی کاسراغ لگایا تھا، ذرائع کا کہنا تھا کہ اکرم اشرف گوندل نے18-2017میں پرائزبانڈزسے1کروڑ روپےجیتے، پرائزبانڈز کے انگریزی حروف مختلف اور سیریل نمبر ایک تھے، جو ممکن نہیں۔
نیب ذرائع نے بتایا تھا کہ ملزم کےماتحت ڈائریکٹرایکسائزنےمبینہ طورپر35 لاکھ بطوررشوت وصول کیے، سمری کےاجرامیں ہوٹل نے مبینہ طور پر 7کروڑ روپے بطوررشوت ادا کیے۔
