کراچی: اے آر وائی نیوز کے پروگرام ہر لمحہ پرجوش میں گلوکار علی عظمت نے دلچسپ گفتگو کرتے ہوئے کہا کہ سوچتا ہوں کہ گانا چھوڑ کر پروگرام اینکر بن جاؤں۔
تفصیلات کے مطابق صوفی راک اور جنون سے مشہور ہونے والے سنگر اور میوزیشن علی عظمت نے پی ایس ایل کے رواں سیزن کے سب سے بڑے کرکٹ شو ’ہر لمحہ پرجوش‘ میں شرکت کی اور میزبان وسیم بادامی کے ساتھ دلچسپ گفتگو کی۔
گلوکار علی عظمت کا کہنا تھا کہ اس بار متنازع گانا گانے والے آرٹسٹ کو نہیں لیا گیا، علی ظفر کے ٹوئٹ پر میرا رد عمل ہے کہ اللہ انھیں خوش رکھے، عاصم اظہر نے بہترین گانا گایا ہے۔
ایک اور سوال پر علی عظمت نے کہا کہ ٹی وی پر اینکرز کو زیادہ ٹائم ملتا ہے، مجھے رشک آتا ہے، سوچتا ہوں گانا چھوڑ کر میں بھی پروگرام اینکر بن جاؤں۔
کرکٹ کے دیوانوں کا اپنا شو ’ہرلمحہ پرجوش‘ کا شاندار آغاز
خیال رہے کہ پی ایس ایل سیزن 5 کا آغاز ہو گیا ہے جس کے ساتھ ہی اے آر وائی نیوز پر پی ایس ایل کے رواں سیزن کا سب سے بڑا کرکٹ شو ہر لمحہ پرجوش روزانہ رات 11 سے 12 بجے تک نشر کیا جارہا ہے۔
وسیم بادامی کے معصومانہ سوالات اور منفرد انداز پروگرام کی خاص بات ہیں، شو میں مختلف شخصیات کا روپ دھارے شفاعت علی بھی اپنے فن کا جادو جگا رہے ہیں جبکہ چائلڈ اسٹار احمد شاہ بھی جیوری کا حصہ ہیں۔
