The news is by your side.

Advertisement

علی ترین ایف آئی اے کے سامنے پیش نہ ہوئے

اسلام آباد: تحریک انصاف کے رہنما جہانگیر ترین کے صاحبزادے ایف آئی اے کے سامنے پیش نہ ہوئے۔

تفصیلات کے مطابق تحریک انصاف کے رہنما جہانگیر ترین اور ان کی فیملی کے خلاف منی لانڈرنگ کیس کی تحقیقات میں ان کے صاحبزادے علی ترین ایف آئی اے کے سامنے پیش نہ ہوئے۔

علی خان ترین کا کہنا تھا کہ ذاتی طور پر ایف آئی اے کے سامنے پیش نہیں ہوسکتا،میں اس وقت لندن میں ہوں اور والد کی دیکھ بھال کر رہا ہوں،میرے والد جہانگیر ترین کا لندن میں علاج جاری ہے۔

انہوں نے مزید کہا کہ ایف آئی اے کے سوالات کے جواب کے لیے مناسب وقت درکار ہے۔

ایف آئی اے نے جہانگیرخان ترین اور علی خان ترین کو طلب کر لیا

اس سے قبل گزشتہ روز ایف آئی اے نے تحریک انصاف کے رہنما جہانگیر ترین اور ان کے بیٹے علی ترین کو طلب کیا تھا۔

یاد رہے کہ رواں سال کے آغاز میں پیدا ہونے والے چینی بحران پر ایف آئی اے کی تحقیقاتی رپورٹ میں انکشاف کیا گیا تھا کہ ملک میں چینی بحران کا سب سے زیادہ فائدہ تحریک انصاف کے رہنما جہانگیر ترین، وفاقی وزیر خسرو بختیار کے بھائی اور مونس الہیٰ کو ہوا تھا۔

چینی بحران رپورٹ سامنے آنے کے بعد جہانگیر ترین نے اپنے اوپر لگے الزامات کو مسترد کر دیا تھا اور وفاقی وزیر خسرو بختیار کی وزارت بھی تبدیل کر دی گئی تھی۔

Comments

یہ بھی پڑھیں