کراچی: وزیر بحری امور علی حیدر زیدی نے قائد اعظم ڈے پر آج مزار قائد پر حاضری دی، اس موقع پر انھوں نے تاثرات کے رجسٹر میں قائد اعظم سے انوکھا وعدہ کر لیا۔
اے آر وائی نیوز کے مطابق وفاقی وزیر علی زیدی نے یوم قائد پر قائد کے مزار کی بے حرمتی کرنے والوں کو انصاف کے کٹہرے میں لانے کا وعدہ کر لیا ہے۔
علی حیدر زیدی نے مزار قائد پر تاثرات کے دفتر میں باقاعدہ قائد اعظم کو مخاطب کرتے ہوئے اعلان کیا کہ ڈیئر قائد اعظم! آپ سے وعدہ ہے کہ آپ کے مزار کی حرمت پامال کرنے والوں کو کٹہرے میں لاؤں گا۔
وزیر بحری امور نے تاثرات کی کتاب میں یہ الفاظ انگریزی زبان میں لکھے، جس کے نیچے انھوں نے اپنا دستخط بھی کیا، انھوں نے مزار قائد پر حاضری کے دوران فاتحہ خوانی کی اور عقیدت کے پھول بھی چڑھائے۔
مزارقائدبے حرمتی کیس : مریم نواز اور کیپٹن(ر)صفدر کو بڑا ریلیف مل گیا
خیال رہے کہ آج 25 دسمبر 2020 کو ملک بھر میں قائدِ اعظم محمد علی جناح کا 145 واں یومِ پیدائش مِلّی جوش و جذبے کے ساتھ منایا گیا، ہر سال کی طرح امسال بھی حکومت پاکستان نے یومِ قائد اعظم پر عام تعطیل کا اعلان کیا، اور محمد علی جناح کو خراج تحسین پیش کرنے کے لیے ملک بھر میں تقاریب کا اہتمام کیا گیا۔
بابائے قوم قائدِ اعظم محمدعلی جناحؒ 25 دسمبر 1876 کو سندھ کے موجودہ دار الحکومت کراچی میں پیدا ہوئے، قیامِ پاکستان کے ایک سال بعد 11 ستمبر 1948 کو کراچی ہی میں ان کا انتقال ہوا۔
