کراچی : پاکستان تحریک انصاف کے رہنما علی زیدی کو ان کی پریس کانفرنس کے کچھ دیر بعد ہی گھر سے جیل منتقل کرنے کے احکامات جاری کردیے گئے۔
تفصیلات کے مطابق محکمہ داخلہ سندھ نے پی ٹی آئی رہنما علی زیدی کو جیکب آباد جیل بھیجنے کا حکم جاری کردیا، ان کی رہائش گاہ کو سب جیل قرار دینے کا نوٹیفکیشن بھی واپس لے لیا گیا ہے۔
اس حوالے سے ذرائع کا کہنا ہے کہ علی زیدی کو ایم پی او کے تحت ایک ماہ جیکب آباد جیل میں رکھا جائے گا، اس کے علاوہ محکمہ داخلہ کے نوٹیفکیشن میں فردوس شمیم کو ایم پی او کے تحت سکھر جیل منتقل کرنے کا حکم بھی دے دیا گیا ہے۔
واضح رہے کہ کچھ گھنٹے قبل پی ٹی آئی رہنما علی زیدی نے ایک نجی اسپتال میں اپنا طبی معائنہ کرانے کے بعد صحافیوں سے گفتگو کی تھی جس میں انہوں نے نو مئی کو پیش آنے والے واقعات کی شدید الفاظ میں مذمت کی تھی۔
اپنی گفتگو میں علی زیدی نے عمران خان اور پی ٹی آئی سے اپنی محبت کا اظہار کرتے ہوئے کہا تھا کہ پی ٹی آئی کو بنے ہوئے 23سال ہوگئے ہیں، پارٹی چھوڑنے کا تصور بھی نہیں کرسکتا، میں پی ٹی آئی اس وقت چھوڑوں گا جب عمران خان چھوڑیں گے۔
انہوں نے کہا تھا کہ پولیس والے تو مجھے جیکب آباد لے کر جارہے تھے لیکن ان کا شکر گزار ہوں کہ گھر میں ہی نظربند کیا گیا ہے، تاہم کچھ دیر بعد ہی وزارت داخلہ نے نیا حکم نامہ جاری کردیا۔
