The news is by your side.

Advertisement

تمام سیاست دان جی ایچ کیو گیٹ 4 کی پیداوار ہیں: شیخ رشید

ریلوے اسپورٹس کی گرانٹ 5 کروڑ کرنے کا اعلان، 4 نئی ٹرینیں چلانے جارہے ہیں: وفاقی وزیر

لاہور: وفاقی وزیر شیخ رشید نے تمام سیاست دانوں کو جی ایچ کیو کے گیٹ نمبر 4 کی پیداوار قرار دے دیا۔

تفصیلات کے مطابق لاہور میں ایک تقریب سے خطاب کرتے ہوئے ریلوے وزیر شیخ رشید نے کہا کہ بھٹو سے لے کر نواز شریف تک مارشل لا کی نرسیوں سے پیدا ہوئے لیکن اب وہ فوج نہیں رہی، فوج جمہوریت کو لازم و ملزوم سمجھتی ہے۔

شیخ رشید کا کہنا تھا کہ ملک کے تمام سیاست دان جی ایچ کیو گیٹ نمبر 4 کی پیدوار ہیں، جتنے سیاست دان ہیں وہ زیادہ تر فوج کے گملے اور نرسریوں سے نکلے ہیں، سیاست دان جی ایچ کیو کے آٹھویں گیٹ سے نکل کر حکومت تک پہنچے، ایک دن تمام صحافیوں کو گیٹ نمبر 4 لے جاؤں گا اور 8 سے نکالوں گا۔

انھوں نے کہا کہ عمران خان گیٹ نمبر 4 سے نہیں نکلے نہ ہی وہ فوج رہی، گیٹ نمبر چار نہیں رہا، میرے بعد بدل گیا، نواز شریف اور زرداری کی پارٹی نے مشرف سے ہاتھ ملایا، دونوں کو ساتھ دینے پر شرمندگی نہیں، شہباز شریف لندن میں بیٹھ کر انجوائے کر رہے ہیں لیکن جلد ان کی اچھی خبر آنے والی ہے۔ عمران خان کو نواز شریف کے باہر جانے کا دکھ رہے گا، بلاول نے پلی بارگین نہ کیا تو سیاست سے آؤٹ ہو جائیں گے۔

شیخ رشید نے کوالالمپور سمٹ میں وزیر اعظم عمران خان کی عدم شرکت کے فیصلے پر کہا کہ اس مسئلے پر عمران خان ملک کے لیے پیچھے ہٹے۔ مشرف کیس میں پیرا 66 ان کے خلاف جوڈیشل مارشل لا کے مترداف ہے، پیرا 66 کا میں نے ڈٹ کر مقابلہ کیا ہے۔

قبل ازیں، شیخ رشید نے لاہور میں ریلوے ہیڈکوارٹرز میں منعقدہ اجلاس کی صدارت کی، جس کے بعد انھوں نے ریلوے اسپورٹس کی گرانٹ 5 کروڑ کرنے کا اعلان کیا، اور کہا کہ آیندہ سال اسپورٹس گرانٹ 10 کروڑ روپے کر دی جائے گی، انھوں نے کہا کہ ریل کی نوکریوں میں کھلاڑیوں کا کوٹہ ہوگا، کھلاڑیوں کی تقرریاں میرٹ پر کی جائیں گی۔

انھوں نے تقریب میں کہا کہ نئے سال میرا ہدف ہے کہ فریٹ اور ٹریک پر کام کیا جائے، اور ریلوے کی زمینیں استعمال میں لائی جائیں، مسافروں کے لیے اسٹیشن اور سہولتوں کو مزید بہتر بنایا جائے، 4 نئی ٹرینیں چلانے اور 4 نئی فریٹ ٹرینوں کی پیش کش بھی کرنے جا رہے ہیں، 7 ٹرینیں نجی سیکٹرز کو دینے جا رہے ہیں، جب کہ ایم ایل ون کا اس شان سے افتتاح کریں گے کہ میرے بعد بھی یاد رہے گا۔

Comments

یہ بھی پڑھیں