کراچی : میٖڈیکل بورڈ نے عمر کے تعین کیلیے دعا زہرا کے تمام ٹیسٹ مکمل کرلئے، رپورٹس آنے کے بعد دعا زہرا کی عمر کا تعین ہو سکے گا۔
تفصیلات کے مطابق دعازہرا کی عمر کے تعین کے لیے چیئرمین ڈاؤ میڈیکل کالج کی پرنسپل پروفیسرصباسہیل کی زیر صدارت میڈیکل بورڈ کا دوسرا اجلاس ختم ہوگیا۔
بورڈ اجلاس میں سروسز اسپتال کے ایم ایس و سول سرجن ڈاکٹرآغاز بیر، پولیس سرجن کراچی ڈاکٹر سمعیہ سید ، لیاری جنرل اسپتال،سروسز اسپتال اورنجی اسپتال کے ریڈیالوجسٹ ، سول اسپتال کی گائنا کولوجسٹ، ڈاؤ میڈیکل کالج کی فرانزک ڈاکٹر ، ڈاؤ میڈیکل کالج اور سروسز اسپتال کی ڈینٹل سرجن شریک ہوئے۔
پولیس نے دعا زہرا کو میڈیکل بورڈ کے سامنے پیش کیا، میڈیکل بورڈ نے دعا زہرا کی والدہ کو طلب کیا، جس کے بعد دعا زہرا کا طبعی معائنہ کیا گیا۔
دعا زہرا کی ہڈیوں اور دانتوں کے ایکسرے، خون کے ٹیسٹ اور جسمانی معائنہ سمیت دیگر ٹیسٹ مکمل کرلئے گئے۔
ذرائع میڈیکل بورڈ کا کہنا ہے کہ دعازہرا کی ایکسرے رپورٹ موصول ہوگئی ہے تاہم انتوں اور جبڑوں کی رپورٹ سمیت دیگر رپورٹس کاانتظار ہے۔
ذرائع نے بتایا کہ تین سے چار دن میں رپورٹ آئے گی، رپورٹس آنے کے بعد دعا زہرہ کی عمر کا تعین ہو سکے گا۔
میڈیکل مکمل ہونے پر پولیس دعا زہرا کو لے کر اسپتال سے روانہ ہوگئی، دعا زہرا کو واپس لاہور پہنچایا جائے گا، دعا زہرا کو لاہور بحفاظت پہنچانے کی ذمہ داری اسی خصوصی ٹیم کی ہوگی جو دعا زہرا کو پنجاب سے کراچی لے کر آئی ہے۔
میڈیکل بورڈ میں پیشی کے موقع پر دعا زہرا کی حفاظت کے لیے فول پروف سیکیورٹی اقدامات کیے گئے تھے۔
یاد رہے آج صبح دعا زہرا کے میڈیکل بورڈ میں پیش ہونے کے معاملے پر اینٹی وائلنٹ اینڈ کرائم سیل کی خصوصی ٹیم دعا زہرا کو تحویل میں لے کر کراچی پہنچی تھی، دعا زہرا کا شوہر ظہیراحمد بھی اس کے ہمراہ تھا ، تاہم ظہیر کو میڈیکل بورڈ میں جانے کی اجازت نہیں تھی۔
یاد رہے عدالتی احکامات کے بعد محکمہ داخلہ سندھ نے محکمہ داخلہ پنجاب کو خط لکھا تھا، جس میں کراچی پولیس کی خصوصی ٹیم سے معاونت کی درخواست کی گئی تھِی، جس کے بعد خصوصی ٹیم گذشتہ روز دعا زہرا کو لینے لاہور پہنچی تھی۔
واضح رہے میڈیکل بورڈ کے پہلےاجلاس میں دعا زہرا کو پیش نہیں کیا جا سکا تھا۔
