لاہور : بجلی چوروں نے لیسکو حکام کو تشدد کا نشانہ بنایا اور دفترمیں گھس کر سرکاری ریکارڈ جلا ڈالا، سی سی پی او نے واقعے کا نوٹس لے لیا ہے۔
تفصیلات کے مطابق لاہور کے علاقے رائے ونڈ میں میں بجلی چوروں نے لیسکو حکام کو تشدد کا نشانہ بنایا اور عملے کو تشدد کا نشانہ بنانے کے بعد 60 حملہ آور لیسکو دفترمیں گھس گئے۔
پولیس نے بتایا کہ حملہ آوروں نے دفاتر ، گاڑیوں کو نقصان پہنچایا، سرکاری ریکارڈ جلا ڈالا، 15 نامزد اور 45 نامعلوم افراد کے خلاف مقدمہ درج کرلیاگیا ہے۔
سی سی پی او نے واقعے کا نوٹس لیتے ہوئے ملزمان کی جلد گرفتاری کا حکم دے دیا ہے۔
یاد رہے بجلی چوروں کے خلاف کریک ڈاؤن کرنے والے ایس ای لیسکو کو قتل کی دھمکیاں ملنے لگیں ہیں ، بجلی چوری کے عمل کے خلاف کریک ڈاؤن کرنے والے ایس ای لیسکو ندیم ملک کو اب قتل کی دھمکیاں دی جارہی ہیں۔
ایس ای لیسکو ننکانہ ندیم ملک کا کہنا تھا کہ فون پر جان سے مارنے کی دھمکی ملی رہی ہے، اعلیٰ حکام کو دھمکی ملنے سے متعلق آگاہ کر دیا ہے۔
