امریکا میں مسلمان طالب علم کو دہشتگرد کہنے پر ہائی اسکول کے ٹیچر کو معطل کر دیا گیا۔
امریکی میڈیا رپورٹس کے مطابق یہ واقعہ ریاست نیوجرسی کے ریج فیلڈ میموریل ہائی اسکول میں پیش آیا جہاں مسلمان طالب علم کو ایک استاد کی جانب سے نفرت انگیز رویے کا سامنا کرنا پڑا۔
کونسل آف امریکن اسلامک ریلیشنز کے ایگزیکٹو ڈائریکٹر کا کہنا ہے کہ 17 سالہ محمد زوبی نے اہل خانہ کو اپنے ساتھ پیش آنے والے واقعے کی تفصیلات سے آگاہ کرتے ہوئے بتایا کہ استاد نے سب کے سامنے اسے دہشت گرد کہا۔
ان کے مطابق جب محمد زبی نے اپنے ریاضی کے استاد سے پوچھا کہ انہیں ہوم ورک دیا جائے تو ٹیچر نے دیگر طلبہ کی موجودگی اور ایک دوسرے ٹیچر کے سامنے یہ کہا کہ ہم دہشتگردوں سے بات نہیں کرتے۔
والدین نے واقعے کی شکایت اسکول انتظامیہ سے کی جس نے فوری طور پر انکوائری شروع کرتے ہوئے ٹیچر کو معطل کر دیا اور تحقیقات مکمل ہونے تک استاد کو تدریس سے روک دیا گیا۔
ریج فیلڈ اسکول ڈسٹرکٹ نے بیان میں کہا ہے کہ کسی بھی طالب علم یا عملے کے ممبر کے ساتھ کسی بھی قسم کے امتیازی سلوک کو قطعی طور پر برداشت نہیں کیا جاسکتا۔