سری نگر: کشمیر شاہراہ میں ہندو یاتریوں کی بس کھائی میں گرنے سے 16امرناتھ یاتری ہلاک جبکہ 27 شدید زخمی ہو گئے۔
بھارتی میڈیا کے مطابق مقبوضہ کشمیر میں امرناتھ مندر سے یاتریوں کی بس یاتری نواسن بیس کیمپ جموں سے وادی کشمیر کی طرف آرہی تھی کہ ضلع رام بن کے بانہال علاقہ میں بس کا خطرناک حادثہ پیش آیا۔
بانہال کے علاقے میں فوجی کیمپ کے قریب بس کا ٹائر پھٹ گیا، جس کے نتیجے میں بس سڑک سے لڑھک کر ایک 150 فٹ گہری کھائی میں جاگری ، جس کے نتیجے میں 16 افراد موقع پر ہی ہلاک ہوگئےجبکہ 27 شدید زخمی ہوئے۔
پولیس حکام کا کہنا ہے کہ ہلاک ہونے والوں میں 14 مرد اور دو خواتین شامل ہیں جبکہ زخمی ہونے والے افراد کو ہیلی کاپٹر کی مدد سے اسپتال منتقل کر دیا گیا ہے، بس میں 46 افراد سوار تھے، جن میں سے زیادہ تر افراد کا تعلق راجستھان اور بہار سے تھا۔
بھارتی وزیراعظم نریندر مودی نے حادثے میں انسانی جانوں کے ضیاع پر افسوس کا اظہار کرتے ہوئے کہا کہ میری دعائیں ہلاک و زخمی ہونے والے افراد کے خاندان کے ساتھ ہیں۔
Extremely pained by the loss of lives of Amarnath Yatris due to a bus accident in J&K. My thoughts are with the families of the deceased.
— Narendra Modi (@narendramodi) July 16, 2017
خیال رہے کہ امرناتھ مندر کو ہندو مذہب کے ماننے والے مقدس مقام سمجھتے ہیں اور ہر سال ہزاروں یاتری مندر میں حاضری کے لیے آتے ہیں یہ مندر مقبوضہ کشمیر کے علاقے پھلگام میں واقع ایک پہاڑ کی چوٹی پر واقع ہے۔