دنیا میں حیات کی بقا کے لیے جنگلوں کا وجود بے حد ضروری ہے اور ان جنگلوں میں سب سے اہم جنگل ایمزون کا ہے جسے اس زمین کے پھیپھڑے بھی کہا جاتا ہے۔
ماہرین کے مطابق یہ جنگل ساڑھے پانچ کروڑ سال پرانا ہے، ایمزون کا جنگل دنیا کے 9 ممالک تک پھیلا ہوا ہے، جس میں سرفہرست برازیل ہے اور اس کا کل رقبہ 55 لاکھ مربع کلومیٹر پر محیط ہے، جبکہ پاکستان کا رقبہ 7 لاکھ 95 ہزار مربع کلومیٹر ہے۔
ایمزون یونانی زبان کا لفظ ہے، جس کے معنی ’جنگ جوعورت ‘ کے ہیں۔ یہاں 400 سے زائد جنگلی قبائل آباد ہیں، ان کی آبادی کا تخمینہ 45 لاکھ کے قریب بتایا گیا ہے۔ یہ لوگ اکیس ویں صدی میں بھی جنگلی انداز میں زندگی گذاررہے ہیں۔
زمین کی 20 فیصد آکسیجن صرف ایمزون کے درخت اور پودے پیدا کرتے ہیں جبکہ دنیا کے 40 فیصد جانور ، چرند، پرند، حشرات الارض بھی یہیں ایمزون میں ہی پائے جاتے ہیں۔ اس تاریخی جنگل کے کچھ علاقے اتنے گھنے ہیں کہ وہاں سورج کی روشنی نہیں پہنچ سکتی اور دن میں بھی رات کا سماں ہوتا ہے۔
یہاں جانوروں کے علاوہ رینگنے والے کیڑوں کی بھی کئی ایک اقسام پائی جاتی ہیں ، ایسے زیریلے حشرات الارض بھی پائے جاتے ہیں کہ اگر کسی انسان کو کاٹ لیں تو دنیا کی کوئی دوا کارگر ثابت نہ ہو اور وہ چند سیکنڈ میں مرجائے ۔
ایمزون نامی اس طلسماتی جنگل کی بقا کا دارومداردیائے امیزون پر ہے ، جو کہ پانی کی مقدار کے اعتبار سے دنیا کا سب سے بڑا دریا ہے اوراس کی لمبائ 7ہزار کلومیٹر ہے۔ دریائے ایمزون میں مچھلیوں کی 30 ہزار اقسام پائی جاتی ہیں جو کہ دنیا کے اور کسی بھی دریا کی نسب کئی گنا زیادہ ہیں۔
ایمزون کے جنگلات میں 60 فیصد جاندار ایسے ہیں جو ابھی تک بے نام ہیں، یہاں کی مکڑیاں اتنی بڑی اور طاقتور ہوتی ہیں کہ پرندوں تک کو دبوچ لیتی ہیں۔ یہی نہیں بلکہ اور کئی چیزوں کی طرح یہاں پھلوں کی بھی 30 ہزار اقسام پائی جاتی ہیں۔
مہم جو اور ماہرینِ حیاتیات ابھی تک اس جنگل کے محض 10 فیصد حصے کو ہی دریافت کرسکے ہیں اور باقی حصہ دریافت کرنا ابھی باقی ہے ،اگر آپ ایمزون کے گھنے جنگلات میں ہوں اور موسلا دھار بارش شرع ہوجائے تو جنگل کے گھنے پن کے سبب تقریبا 12 منٹ تک آپ تک بارش کا پانی نہیں پہنچے گا۔
یقیناً یہ جنگل کرہ ارض پر قدرت کا سب سے بڑا عجوبہ ہے جو ہمہ وقت مہم جوئی کے شوقین افراد کو چیلنج کرتا ہے کہ آؤ اور مجھے دریافت کرو۔
