پیٹرولیم مصنوعات کی بڑھتی قیمتوں کے پیش نظر امریکی شہری نے اٹھارہ کروڑ روپے سے زائد کا پیٹرول مفت دینے کا اعلان کردیا۔
کروڑوں روپے کا پیٹرول مفت میں دینے والے امریکی ارب پتی اور میئر کیلئے سابق امیدوار ڈاکٹر ولی ولسن ایک انسان دوست شخصیت ہیں، جو ماضی میں بھی 10 لاکھ ڈالر پیٹرول مفت تقسیم کرچکے ہیں۔
منصوبے کے تحت شہر بھر کے 50 پمپوں پر فی شخص 50 ڈالر تک کا پیٹرول حاصل کرسکے گا، جس کے بعد شہر کے پیٹرول پمپوں پر گاڑیوں کی طویل قطاریں لگ گئیں۔
ڈاکٹر ولی ولسن کا کہنا ہے کہ ہر پمپ بیس ہزار ڈالر کا پیٹرول مفت دے گا جس کی رقم پہلے ہی ادا کی جاچکی ہے۔
رپورٹ کے مطابق امریکی تاجر کی اس انسانی ہمدردی کے باعث شہر میں انتہائی بے نظمی پیدا ہوگئی تھی کیوں کہ گاڑیوں کی لمبی قطاروں کے باعث متعدد سڑکیں بند اور ٹریفک کی روانی متاثر ہوئی تھی۔
ٹریفک کی بدترین صورتحال دیکھ کر پولیس کو انتظامات سنبھالنے پڑے اور ڈاکٹر ولی ولسن کو لوگوں سے نظم و ضبط برقرار رکھنے کی درخواست کرنا پڑیں۔
خیال رہے کہ امریکی شہریوں کو ان دنوں تاریخی مہنگائی کا سامنا کرنا پڑ رہا ہے جس کے باعث غریب اور متوسط طبقے کا گزارا انتہائی مشکل ہوگیا ہے۔
