واشنگٹن : امریکی شہر ڈیلاس میں نامعلوم حملہ آوروں کی فائرنگ کی زد مین آکر مشہور ریپر میلون نوبل عرف ایم او 3 جان کی بازی ہار گئے۔
غیر ملکی خبر رساں ادارے کی رپورٹ کے مطابق فائرنگ کا واقعہ امریکی ریاست ٹیکساس کے شہر ڈیلاس میں پیش آیا جہاں نامعلوم افراد نے معروف ریپر 26 سالہ میلون نوبل عرف ایم او 3 کو فائرنگ کرکے قتل کردیا۔
میڈیا رپورٹس میں بتایا گیا ہے کہ گزشتہ رات کلیئر ڈین ڈرائیو پر واقع انٹراسٹیٹ 35 پر سیاہ رنگ کی گاڑی میں موجود مشتبہ شخص نے فائرنگ کی تھی جس کی زد میں آکر ایم او تھری زخمی ہوئے۔
فائرنگ کے بعد ریپر کو شدید زخمی حالت میں اسپتال منتقل کیا گیا تاہم وہ زخموں کی تاب نہ لاتے ہوئے دوران علاج دم توڑ گئے۔
امریکی پولیس نے میڈیا کو بتایا کہ مشتبہ سیاہ فام مسلح شخص امریکی ریپر کا پیچھا کر رہا تھا جب انہوں نے مسلح شخص کو مشکوک انداز میں پیچھا کرتے دیکھا تو ہائی وے کی جانب بھاگنا شروع کردیا تھا تاہم ان کا بھاگنا کام نہ آیا اور حملہ آور نے فائرنگ کرکے انہیں قتل کردیا۔
