The news is by your side.

Advertisement

پاکستان کے لیے عالمی سطح پر ایک اور اعزاز

کراچی: وفاقی وزیر ٹیلی کمیونی کیشن امین الحق جی 20 ممالک کے ورلڈ بزنس اینجل انویسٹمنٹ فورم کی ایک اہم کمیٹی کے صدر منتخب ہو گئے۔

تفصیلات کے مطابق امین الحق جی 20 ڈبلیو بی اے ایف کی ٹیکنالوجی و انوویشن کمیٹی کے صدر منتخب ہو گئے، اس عہدے کے لیے بھارت بھی امیدوار تھا تاہم یہ اعزاز پاکستان کے حصے میں آیا۔

ورلڈ بزنس اینجل انویسٹمنٹ فورم نے پاکستان کا انتخاب 127 ممالک میں کیا۔ اس تنظیم میں ہالینڈ کی ملکہ میکسیما، ترکی کے نائب وزیر اعظم سمیت متعدد عالمی رہنما رکن ہیں۔

سید امین الحق کا انتخاب پاکستان میں آئی ٹی اور ٹیلی کام شعبے میں نمایاں کردار کی بنیاد پر کیا گیا ہے، یہ تنظیم دنیا بھر میں اسٹارٹ اپس، SMEs، کی حوصلہ افزائی اور سرمایہ کاری میں معاونت فراہم کرتی ہے، اور سائنس ٹیکنالوجی و انوویشن کے فروغ کے لیے عملی اقدامات بھی یقینی بناتی ہے۔

وفاقی وزیر نے اعزاز کے حوالے سے گفتگو کرتے ہوئے کہا عالمی تنظیم کی جانب سے کمیٹی صدر کا انتخاب ایک اعزاز ہے، جس سے جنوبی ایشیا میں پاکستان کے لیے ٹیکنالوجی حب بننے کے لیے راہ ہموار ہوگی۔

امین الحق نے امید ظاہر کی کہ کمیٹی کی صدارت ملنے کے بعد کاروبار کے فروغ، بیرونی سرمایہ کاری اور روزگار کے مواقع میں بھی اضافہ ہوگا۔

انھوں نے کہا وزیر اعظم کے عزم کے تحت بین الاقوامی سطح پر پاکستانی ہنرمندوں کی رسائی ہو سکے گی، اسٹارٹ اپس، چھوٹے کاروباری افراد اور کمپنیوں کو عالمی سرمایہ کاروں تک رسائی ہوگی، پاکستان کے آئی ٹی، سائنس و ٹیکنالوجی اور ٹیلی کمیونیکشن کے شعبے کے لیے دنیا بھر کے دروازے کھلیں گے۔

Comments

یہ بھی پڑھیں