The news is by your side.

Advertisement

سمرن کا ہاتھ راج کو دینے والے اداکار کو گزرے 14 برس بیت گئے

ممبئی: بالی ووڈ کی سدا بہار فلم دل والے دلہنیا لے جائیں گے میں اپنی فلمی بیٹی سمرن کا ہاتھ راج ملوتھرا کو دینے والے چوہدری بلدیو سنگھ کو مداحوں سے بچھڑے چودہ برس گزر گئے۔

تفصیلات کے مطابق بالی ووڈ فلم انڈسٹری میں بطور ولن کئی برسوں تک راج کرنے والے اداکار امریش پوری 12 جنوری 2005 کو دماغ کی شریان پھٹنے سے دنیائے فانی سے کوچ کر گئے تھے۔

امریش پوری نے متعدد بھارتی فلموں میں ولن کا کردار بخوبی نبھایا، اُن کی بے مثال اداکاری مداحوں کے ذہنوں پر انمٹ نقوش چھوڑے ہوئے ہے۔

بھارت کے علاقے جالندھر میں 1932 کو پیدا ہونے والے امریش پوری نے منفی کردار سے فلمی دنیا میں قدم رکھا اور مختصر عرصے میں انڈسٹری پر چھا گئے۔

فلم مسٹر انڈیا میں موگیمبو کا کردار امریش پوری کے لیے خوش نصیبی ثابت ہوا جس کے بعد انہوں نے شہرت کی بلندیوں کو چھوا، بعد ازاں امریش پوری رام لکھن، سوداگر، کرن ارجن، کوئلہ، ودھاتا، ہیرو، پردیس، میری جنگ، دل والے دلہنیا لے جائیں گے اور دل جلے میں اپنے فن کا مظاہرہ کیا۔

مزید پڑھیں: فلم ”دل والے دلہنیا لے جائیں گے “ کے 20 سال مکمل، شاہ رخ اور کاجول کی ویڈیو جاری

آنجہانی اداکار نے ہالی ووڈ فلم جہاں انڈیانا جونز اینڈ دی ٹیمپ آف ڈوم جیسی بلاک بسٹر فلم میں بھی بطور ولن اداکاری کے جوہر دکھائے اور کئی ایوارڈز اپنے نام کیے۔

سن 2005 میں بروز بدھ 12 جنوری کو بالی ووڈ اداکار کو تشویشناک حالت میں اسپتال لایا گیا جہاں وہ دنیا کو ہمیشہ کے لیے خیر باد کہہ گئے، میڈیکل رپورٹ کے مطابق اداکار کی موت دماغ کی شریان پھٹ جانے کی وجہ سے ہوئی۔

Comments

comments

یہ بھی پڑھیں