The news is by your side.

Advertisement

3 غیر ملکیوں سمیت 10 منشیات اسمگلرز گرفتار

راولپنڈی: اینٹی نارکوٹکس فورس (اے این ایف) نے ملکی اور بین الاقوامی سطح پر کارروائیاں کر کے غیر ملکیوں سمیت 10 منشیات اسمگلرز کو گرفتار کر لیا۔

تفصیلات کے مطابق اے این ایف انٹیلیجنس نے ملکی و بین الاقوامی سطح پر کارروائیاں کر کے 595 کلوگرام ہیروئن اور 5.033 کلوگرام کوکین برآمد کر لی۔

ان کارروائیوں کے دوران 10 اسمگلرز گرفتار کیے گئے ہیں، جن میں 3 ویسٹ افریقن باشندے شامل ہیں، اور ان میں ایک عورت بھی ہے۔

علامہ اقبال انٹرنیشنل ایئر پورٹ لاہور پر ایتھوپیا سے آنے والی مغربی افریقی خاتون سے جب 1.393 کلوگرام کوکین برآمد ہوئی، تو اس کیس کے تعاقب میں اے این ایف نے فیصل آباد ایئر پورٹ پر کارروائی کرتے ہوئے 2 غیر ملکی باشندوں کو گرفتار کر لیا۔

فیصل آباد ایئر پورٹ پر بحرین سے آنے والے 2 ویسٹ افریقی باشندوں کے قبضے سے 3.640 کلوگرام کوکین برآمد کی گئی۔

اے این ایف انٹیلیجنس کی سری لنکن سیکیورٹی حکام کو فراہم کی جانے والی خفیہ معلومات کے نتیجے میں کھلے سمندر میں ایک کارروائی کی گئی، جس کے دوران 2 کشتیوں سے مجموعی طور پر 595 کلوگرام ہیروئن برآمد ہوئی۔

اس کارروائی کے دوران مجموعی طور پر 7 ملزمان کو گرفتار کیا گیا، جن میں پاکستانی و غیر ملکی باشندے شامل ہیں۔ ترجمان اے این ایف کا کہنا ہے کہ دیگر ملزمان کی گرفتاری کے لیے مزید تفتیش جاری ہے۔

Comments

یہ بھی پڑھیں