ریاض: سعودی وزارت افرادی قوت نے اقاموں کی تجدید کے حوالے سے جھوٹی خبروں پر وضاحت جاری کی ہے۔
تفصیلات کے مطابق مملکت کی وزارت افرادی قوت نے بتایا کہ ملازمین کے اقاموں کی سالانہ بنیادوں پر تجدید کا عمل جاری ہے۔ سوشل میڈیا پر من گھڑت باتیں زیر گردش ہیں کہ وزارت نے سالانہ تجدید کا عمل ختم کردیا ہے۔
سعودی وزارت نے کہا کہ کارکنوں کے اقاموں کی تجدید کابینہ کے فیصلے کے مطابق جاری ہے جبکہ وہ افراد جو سالانہ بنیاد پر اقامہ کی تجدید کرانا چاہتے ہیں وہ بھی کرائی جاسکتی ہے۔
سعودی کابینہ نے غیر ملکی کارکنوں کے اقامے کی فیس تین، چھے اور بارہ ماہ کے لیے جمع کرانے کی سہولت کی منظوری دی تھی جس کے باعث انہیں یکمشت اقامہ تجدید کی فیس ادا کرنے میں سہولت میسر آئی۔
اقاموں کی تجدید کے حوالے سے دی جانے والی مدت کی رعایت سے ان تارکین کو خاص طورپر فائدہ ہوگا جو اپنے اہل خانہ کے ہمراہ مملکت میں مقیم ہیں۔
تجدید کے نئے قانون کے مطابق تارکین اپنے اہل خانہ عائد تین ماہ کی فیس جمع کرانے کے بعد اقامہ تجدید کراسکتے ہیں، اس طرح تارکین پریکمشت 12 ماہ کی فیس کا بوجھ کم ہو جائے گا۔
خاص کر وہ تارکین بھی مستفید ہوسکیں گے جو اپنے اہل خانہ کو مستقل بنیادوں پر وطن بھیجنا چاہتے ہیں اور کسی طرح کی مجبوری کے باعث وہ انہیں چند ماہ روکے رکھنا چاہتے ہیں۔