The news is by your side.

Advertisement

کراچی میں ایک اور شہری لٹ گیا، فوٹیج منظرعام پر آگئی

کراچی میں لوٹ مار کا سلسلہ تھم نہ سکا ہفتے کی صبح ڈاکو بھرے بازار میں شہری سے اس کی موٹرسائیکل اور موبائل فون چھین کر فرار ہوگئے۔

کراچی میں ڈکیتی کی وارداتوں پر پولیس قابو پانے میں ناکام ہوگئی اور صبح سویرے گھروں سے نکلنے والے شہری ڈاکوؤں کے لیے آسان ہدف بن گئے۔

کراچی کے علاقے گارڈن میں بھی صبح کے وقت وارداتیں عروج پر پہنچ گئیں، پیر کے روز بھی شہری کو بازار کے اندر موٹرسائیکل سے محروم کردیا گیا جس کی سی سی ٹی وی فوٹیج منظرعام پر آگئی۔

واقعہ عثمان آباد کے علاقے میں پیش آیا جہاں شہری کسی کام سے نکلا تھا کہ اس کے تعاقب میں آنے والے ڈاکو اس سے بزور اسلحہ نئی موٹرسائیکل چھین کر فرار ہوگئے۔

منظرعام پر آنے والی سی سی ٹی وی فوٹیج میں دیکھا جاسکتا ہے کہ ایک گلی میں واقع مارکیٹ میں موٹرسائیکل سوار شہری داخل ہوتا ہے اور ابھی دکان کے باہر گاڑی کھڑی کررہا ہوتا ہے کہ اس کے تعاقب میں آنے والے موٹرسائیکل سوار دو ڈاکو آجاتے ہیں۔

تعاقب میں آنے والے دونوں ڈاکوؤں نے شلوار قمیض اور سر پر پی کیپ پہن رکھی ہے اور منہ کو ماسک سے ڈھانپا ہوا ہے۔

فوٹیج میں نظر آرہا ہے کہ ایک مسلح ڈاکو اتر کر شہری سے اس کی بائیک کی چابی لیتا ہے اور اسے سائیڈ میں کرکے گاڑی لے کر دونوں ڈاکو رفوچکر ہوجاتے ہیں شہری ان کے پیچھے بھاگتا ہے لیکن یہ بے سود ہوتا ہے۔

پولیس نے شہری سے واردات کا مقدمہ درج کرلیا ہے لیکن فوٹیج منظرعام پر آنے کے باوجود تاحال ملزمان کو گرفتار نہیں کیا جاسکا ہے۔
متاثرہ شہری کے مطابق اس نے چند روز قبل ہی نئی موٹرسائیکل خریدی تھی۔

Comments

یہ بھی پڑھیں